دہلی کانگریس کے سینئر ترجمان ڈاکٹر نریش کمار کی اہلیہ کُسم دیوی کا انتقال، کانگریس لیڈران اور کارکنان کا اظہار تعزیت

نئی دہلی: دہلی کانگریس کے سینئر ترجمان ڈاکٹر نریش کمار کی اہلیہ کُسم دیوی (58 سال) کا ہارٹ اٹیک کی وجہ سے انتقال ہو گیا۔ موصولہ اطلاع کے مطابق کُسم دیوی کو گزشتہ کل رات تقریباً 11:30 بجے اچانک دل کا دورہ پڑا، جس کے بعد اہل خانہ نے انہیں فوری طور پر راجدھانی واقع اَگرسین اسپتال لے کر پہنچے۔ اسپتال کے ڈاکٹروں نے انہیں بچانے کی ہر ممکن کوشش کی، لیکن تمام تر کوششوں کے باوجود انہیں بچایا نہیں جا سکا۔ کُسم دیوی نے آج صبح تقریباً 7:30 بجے آخری سانس لی۔

کُسم دیوی کے انتقال سے اہل خانہ سمیت سیاسی اور سماجی حلقوں میں سوگ کی لہر دوڑ گئی۔ آج دوپہر 12 بجے ان کی آخری رسومات ان کے آبائی گاؤں ’ہرنا کودنا‘ میں ہندو رسومات کے مطابق ادا کی گئیں۔ ان کی آخری رسومات میں بڑی تعداد میں سماجی کارکنان، کانگریس لیڈران اور مختلف سیاسی پارٹیوں سے منسلک نمائندے موجود رہے اور مرحومہ کو خراج عقیدت پیش کیا۔

اس مصیبت کے موقع پر ڈاکٹر نریش کمار نے جذباتی بیان جاری کرتے ہوئے کہا کہ ’’میری اہلیہ میری زندگی کی سب سے بڑی طاقت تھیں۔ ان کا اچانک اس طرح چلے جانا میرے اور میرے اہل خانہ کے لیے ناقابل تلافی نقصان ہے۔ اس مشکل وقت میں کانگریس قیادت، ساتھیوں، دوستوں اور تمام خیر خواہوں نے جو تعزیت کا اظہار کیا ہے، اس کے لیے میں دل کی گہرائیوں سے شکر گزار ہوں۔ بھگوان ان کی روح کو سکون عطا کرے۔‘‘

قابل ذکر ہے کہ گزشتہ سال ستمبر میں ڈاکٹر نریش کمار کے والد پردھان لکھمی چند کا بھی انتقال ہو گیا تھا۔ ایک ہی سال میں خاندان پر آئے ان مسلسل المناک حادثات سے سبھی غمزدہ ہیں۔ کانگریس لیڈران، کارکنان اور خیر خواہوں نے ڈاکٹر نریش کمار اور ان کے اہل خانہ کے تئیں گہری تعزیت کا اظہار کرتے ہوئے مرحومہ کی روح کو سکون اور اہل خانہ کو اس ناقابل برداشت غم کو برداشت کرنے کی طاقت کے لیے دعا کی۔