کلگام: ملی ٹنٹوں اور سیکورٹی فورسز کے درمیان تصادم، 2 ملی ٹنٹ ہلاک

سری نگر: جموں کشمیر کے ضلع کلگام میں ہفتہ کی صبح محاصرہ اور تلاشی مہم کے دوران سیکورٹی فورسیز اور ملی ٹنٹوں کے درمیان تصادم شروع ہوگیا۔ جس میں دو ملی ٹنٹ ہلاک ہوئے ہیں تاہم آپریشن ابھی جاری ہے، سرکاری ذرائع نے بتایا کہ نیشنل رائفلز، جموں کشمیر پولیس کا خصوصی مہم دستہ اور سینٹرل ریزرو پولیس فورس کے جوانوں نے کلگام ضلع کے وانپورہ میں ملی ٹنٹوں کے چھپے ہونے کی خفیہ اطلاع ملنے پر مشترکہ مہم چلائی ہے۔

سیکورٹی فورس کے جوان جب گاؤں کے سبھی باہر جانے والے راستوں کو سیل کرکے ایک خاص علاقے کی جانب آگے بڑھ رہے تھے تبھی وہاں چھپے دہشت گردوں نے ان پر جدید خودکار ہتھیاروں سے فائرنگ شروع کردی۔ سیکورٹی فورسز نے بھی جوابی فائرنگ کی۔ علاقے میں دو سے تین دہشت گردوں کی موجودگی کی رپورٹ ہے۔ ملی ٹنٹوں اور سیکورٹی فورسز کے درمیان ہونے والی تصادم آرائی میں دو ملی ٹنٹ ہلاک ہوئے ہیں تاہم آپریشن ابھی جاری ہے اور مہلوک ملی ٹنٹوں کی شناخت ہونا بھی ابھی باقی ہے۔

موصولہ اطلاعات کے مطابق ملی ٹنٹوں کے چھپنے کی اطلاع موصول ہونے پر فوج کی ایک آر آر، سی آر پی ایف اور پولیس کی ایک مشترکہ پارٹی نے کولگام کے ونپورہ علاقے کو ہفتے کی علی الصبح محاصرے میں ملی ٹنٹوں کی تلاش شروع کردی جس دوران طرفین کے درمیان آمنا سامنا ہوا اور ایک تصادم چھڑ گیا جس میں دو ملی ٹنٹ مارے گئے۔ دریں اثنا انتظامیہ نے ضلع میں بنا بر احتیاط موبائل انٹرنیٹ خدمات معطل کردی ہیں۔ نیز کسی بھی طرح کے احتجاجی مظاہروں کو روکنے کے لئے سیکورٹی فورسز کی اضافی نفری تعینات کردی ہے۔