نازیبا تبصرہ کرنے والے گورنر کو عہدے پر رہنے کا کوئی حق نہیں: دانش

بہوجن سماج پارٹی کے سینئر لیڈر اور رکن پارلیمنٹ کنور دانش علی نے کہا کہ مہاراشٹر کے گورنر بھگت سنگھ کوشیاری کو عظیم افراد ساوتری بائی پھولے اور جیوتیبا پھولے کے بارے میں نازیبا تبصرہ کرنے کے سبب اپنے عہدے پر برقرار رہنے کا حق نہیں ہے۔

گورنر کوشیاری کے بیان کی مذمت کرتے ہوئے امروہہ کے ایم پی مسٹر علی نے آج کہا کہ بی جے پی کو بتانا چاہئے کہ اس کے لئے کس کو معافی مانگنی چاہئے انہوں نے مسٹر کوشیاری کے بیان کا ایک ویڈیو ٹویٹ کرتے ہوئے کہا، ’’انتہائی شرمناک۔ مہاراشٹر کے گورنر کی طرف سے عظیم لوگوں کے بارے میں اس طرح کا فضول مذاق بنانا قابل مذمت ہے۔ بی جے پی بتائے اس کے لئے کسے معافی مانگنی چاہئے؟ میں راشٹرپتی بھون سے درخواست کرتا ہوں کہ ایسے بے حس شخص کو گورنر بنے رہنے کا حق نہیں ہے۔

انہوں نے کہا کہ خواتین کی آزادی کی تحریک کی پہلی روشنی اٹھانے والی عظیم سماجی کارکن ساوتری بائی پھولے کے بارے میں آئینی عہدہ پر فائز شخص کی طرف سے ناشائستہ تبصرہ کرنا انتہائی شرمناک ہے۔

بی ایس پی ایم پی کے ذریعہ ٹویٹ کردہ ویڈیو میں مسٹر کوشیاری ہنستے ہوئے کہتے ہیں کہ ساوتری بائی پھولے کی شادی نو سے تیرہ سال کی عمر میں جیوتیبا پھولے سے ہوئی تھی۔ اس کے بعد وہ ہنستے ہوئے نازیبا تبصرہ کیا ۔