کیجریوال کی رام جنم بھومی ٹرسٹ کی تشکیل پر مودی کو مبارک باد

نئی دہلی: عام آدمی پارٹی (آپ) کے کنوینر اور دہلی کے وزیراعلی اروند کیجریوال نے ایودھیا میں رام مندر کی تعمیر کے لئے وزیراعظم نریندر مودی کے بدھ کو ’نیاس‘ بنانے کے اعلان کا خیر مقدم کرتے ہوئے کہا ہے کہ اچھے فیصلوں کا کوئی وقت نہیں ہوتا ہے۔

وزیر اعظم مودی نے لوک سبھا میں آج ایودھیا میں بننے والے رام مندر کی تعمیر کے لئے ’نیاس‘ کا اعلان کیا۔ کیجریوال نے میڈیا سے بات چیت کے دوران رام مندر کی تعمیر کے سلسلے میں نیاس کے اعلان کیے جانے پر مودی کو مبارکباد دی اور کہا کہ اچھے فیصلوں کے لئے کوئی وقت نہیں ہوتا ہے۔

انہوں نے کہا کہ اچھے فیصلوں کا اعلان کبھی بھی کیا جاسکتا ہے۔ ایودھیا میں رام مندر کی تعمیر کا راستہ سپریم کورٹ کے فیصلے سے صاف ہوا۔ اعلی ترین عدالت کے احکامات کے مطابق ہی مرکزی حکومت نے ’شری رام جنم بھومی تیرتھ چھیتر‘ کی تشکیل دی ہے۔

رام مندر نرمان نیاس کی تشکیل کی مبارک باد دینے کے بعد کیجریوال نے بھارتیہ جنتا پارٹی (بی جے پی) کو گھیرتے ہوئے دہلی اسمبلی انتخابات کے لئے پارٹی کی طرف سے وزیراعلی کے چہرے کا اعلان نہیں کیے جانے پر اسے ہدف تنقید بنایا۔

کیجریوال نے کل پارٹی کا انتخابی منشور جاری کرتے ہوئے اسمبلی انتخابات میں بی جے پی کی طرف سے وزیراعلی کا چہرہ نہیں ہونے پر مرکزی وزیر داخلہ کو بحث کے لئے چیلنج کیا تھا۔ شاہ نے اس چیلنج پر کہا تھا کہ وزیراعلی سے اس مسئلہ پر بی جے پی کا کوئی بھی کارکن بحث کرنے کے لے تیار ہے۔ اس پر کیجریوال نے کہا کہ شاہ خود آکر بحث کریں۔

بی جے پی کے رکن پارلیمنٹ پرویش صاحب سنگھ ورما کے دہشت گردی والے بیان پر کیجریوال نے کہا یہ قومی راجدھانی کے لوگ یہ جاننا چاہتے ہیں کہ دہلی کا یہ بیٹا دہشت گرد کیسے ہے۔ انہوں نے کہا کہ وزیراطلاعات ونشریات پرکاش جاویڈکر نے بھی کہا کہ کیجریوال کے دہشت گرد ہونے کے ثبوت ہیں تو میرا مطالبہ ہے کہ وہ ثبوت پیش کریں۔