کیجریوال بوسٹر ڈوز مفت فراہم کرنے کے لیے نجی اسپتالوں میں انتظامات کریں: انیل چودھری

دہلی کانگریس نے کہا ہے کہ حکومت ایک بار پھر پرائیویٹ اسپتالوں کی جیبیں بھرنے کا کام شروع کر رہی ہے، کیونکہ سرکاری اسپتالوں میں بوسٹر خوراک دستیاب نہیں ہوگی

دہلی کانگریس کے صدر انیل چودھری / آئی اے این ایس
دہلی کانگریس کے صدر انیل چودھری / آئی اے این ایس
user

قومی آوازبیورو

نئی دہلی: مرکزی حکومت نے 10 اپریل سے 18 سال سے زیادہ عمر کے تمام لوگوں کے لیے کورونا ویکسین کی بوسٹر خوراک لگانے کی منظوری دی ہے۔ دہلی کانگریس نے کہا ہے کہ حکومت ایک بار پھر پرائیویٹ اسپتالوں کی جیبیں بھرنے کا کام شروع کر رہی ہے، کیونکہ سرکاری اسپتالوں میں بوسٹر خوراک دستیاب نہیں ہوگی۔

ریاستی صدر انیل چودھری نے کہا کہ وزیر اعلیٰ کیجریوال کو دہلی کے لوگوں کو مفت بوسٹر خوراک فراہم کرنے کی ذمہ داری قبول کرنی چاہئے اور دہلی کے لوگوں کو مفت ویکسین فراہم کرنے کے اپنے وعدے کو پورا کرنا چاہئے، کیونکہ دہلی والوں کی کمر کورونا کی سبا اور بے لگام مہنگائی سے پہلے ہی ٹوٹ چکی ہے، اب دہلی والے بوسٹر خوراک کا اضافی بوجھ برداشت کرنے کی حالت میں نہیں ہیں۔


اس کے علاوہ دہلی میں ایک بار پھر کورونا کے معاملات میں اضافہ ہوا ہے، جس پر ریاستی کانگریس صدر انیل چودھری نے کہا کہ ڈی ڈی ایم اے کی رہنما ہدایات کے تحت، کورونا سے متعلق اصولوں کی پیروی میں نرمی کے بعد، گزشتہ 4-5 دن سے کووڈ کیسز مسلسل بڑھتے جا رہے ہیں، جسے کیجریوال حکومت پوری طرح نظر انداز کر رہی ہے۔

انہوں نے کہا کہ دہلی حکومت کو لوگوں کو کووڈ بوسٹر ڈوز لگانے کی ذمہ داری لیتے ہوئے، تمام پرائیویٹ ہسپتالوں کو ہدایات جاری کرنی چاہئے کہ وہ بوسٹر ڈوز مفت فراہم کریں اور سرکاری ہسپتالوں میں بھی بوسٹر ڈوز کو یقینی بنائیں، کیونکہ سرکاری ہسپتالوں میں پہلی اور دوسری خوراک مفت دی جا رہی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔