کملیش تِیواری کی بیوی نے سی ایم یوگی کو دی خود سوزی کی دھمکی

اتر پردیش کے لکھنؤ میں ہندو سماج پارٹی کے لیڈر اور ہندو مہاسبھا کے سابق صدر کملیش تیواری کا جمعہ کے روز برسرعام قتل کر دیا گیا تھا۔ زبردست بھیڑ بھاڑ والے اس علاقےمیں کملیش کے قتل سے ماحول میں کافی کشیدگی دیکھنے کو مل رہی ہے اور اس درمیان اہل خانہ نے وزیر اعلیٰ یوگی آدتیہ ناتھ سے ملاقات کرنے کی خواہش ظاہر کی ہے۔ دیر رات جب کملیش تیواری کا جسد خاکی سیتا پور کے محمود آباد واقع ان کی رہائش پر پہنچا تو گھر والوں نے ان کی آخری رسومات ادا کرنے سے انکار کر دیا۔ انھوں نے کہا کہ وزیر اعلیٰ یوگی آدتیہ ناتھ کے آنے تک کملیش کو سپردِ آتش نہیں کیا جائے گا۔ مہلوک کی بیوی نے ساتھ ہی یہ تنبیہ بھی کی ہے کہ اگر وزیر اعلیٰ نہیں آئے تو وہ خودسوزی کر لیں گی۔

کملیش تیواری کے گھر والوں کا کہنا ہے کہ وہ اس وقت تک کملیش تیواری کی لاش کی آخری رسوم ادا نہیں کریں گے جب تک خود وزیر اعلیٰ آدتیہ ناتھ آ کر گھر والوں سے ملاقات نہیں کرتے۔ تیواری کی بیوی نے کہا کہ وہ مل کر یوگی جی سے بات کرنا چاہتی ہیں تاکہ قاتلوں کے خلاف کارروائی ہو سکے۔ اس وقت کملیش تیواری کی لاش آبائی گھر محمود آباد میں ہی موجود ہے اور وہاں پولس کی زبردست سیکورٹی دیکھنے کو مل رہی ہے۔

واضح رہے کہ جمعہ کو کملیش تیواری کا قتل لکھنؤ کے ناقہ علاقے میں گلا ریت کر کر دیا گیا تھا۔ خبروں کے مطابق انھیں گولی بھی ماری گئی تھی۔ پولس نے موقع واردات سے ایک ریوالور بھی برآمدکی ہے۔ اس درمیان سی سی ٹی وی فوٹیج میں مبینہ طور پر قاتل بھاگتے ہوئے نظر آ رہے ہیں۔ فی الحال اس قتل کی وجہ سے صوبے میں سیاسی ماحول کافی گرم ہے اور چپے چپے پر پولس تعینات ہے۔

اس درمیان کملیش تیواری کی ماں اور ان کے بھتیجے نے ایک مقامی بی جے پی لیڈر پر قتل کی سازش رچنے کا الزام عائد کیا ہے۔ کملیش کی ماں نے محمود آباد واقع رام جانکی مندر کے مقدمے بازی کو بھی اس واقعہ سے جوڑا ہے۔ ان کا کہنا ہے کہ شیو کمار گپتا نام کے ایک مقامی بی جے پی لیڈر نے اس قتل کی سازش رچی ہے۔