بہار میں جنگل راج! گھر میں گھس کر فوجی جوان کی بیوی کا قتل

بہار کے ضلع مونگیر واقع قاسم بازار تھانہ حلقہ میں نامعلوم جرائم پیشوں نے پیر کو گھر میں گھس کر ایک خاتون کا گولی مار کر قتل کر دیا اور فرار ہو گئے۔ مہلوکہ کے شوہر سی آئی ایس ایف جوان ہیں اور فی الحال جھارکھنڈ کے دھنبار میں اپنی ذمہ داری انجام دے رہے ہیں۔

پولیس کے ایک افسر نے بتایا کہ آم گاچھی ٹولہ میں بدمعاشوں نے پیر کی صبح سی آئی ایس ایف کے جوان کے گھر میں چہار دیواری لانگھ کر گھسے اور ان کی بیوی دیپکا شرما کا گولی مار کر قتل کر دیا۔ واقعہ کی اطلاع ملنے پر پہنچی پولیس نے جائے حادثہ سے چار کھوکھا برآمد کیا ہے۔ پولیس نے لاش کو پوسٹ مارٹم کے لیے بھیج دیا ہے۔ قتل کے اسباب کا اب تک پتہ نہیں چل پایا ہے۔ پولیس سبھی زاویوں سے معاملے کی جانچ کر رہی ہے۔

پولیس ذرائع کے مطابق دیپکا پر سال 2017 میں بھی حملہ کیا گیا تھا، لیکن تب وہ بچ گئی تھی۔ اس حملے میں اس کی ماں کی موت ہو گئی تھی۔ بتایا جاتا ہے کہ اس معاملے میں مہلوکہ گواہ تھی۔ دیپکا کا مائکہ حویلی کھڑگ پور ڈویژن کے شام پور تھانہ حلقہ میں بتایا جاتا ہے۔ پولیس کے ایک سینئر افسر نے بتایا کہ پہلی نظر میں معاملہ معاشقہ اور ملکیت تنازعہ کا معلوم پڑ رہا ہے۔ پورے معاملے کی جانچ کی جا رہی ہے۔ مہلوکہ کی ایک پانچ سالہ چھوٹی بیٹی بھی ہے۔