جیسیکا کی لڑائی لڑنےوالی ان کی بہن سبرینا کا انتقال

1999میں مشہور ماڈل اورایک بارمیں کام کرنےوالی جیسیکالال کا رات کو دو بجےقتل ہوگیا تھا اور جس شخص کےخلاف قتل کاالزام تھا اس کوپہلے عدالت نےبری کر دیا تھا لیکن جیسیکالال کی بہن سبرینانے یہ لمبی قانونی لڑائی لڑی اور پھر قاتل کو عدالت سےبیس سال کی سزا دلوائی ۔ قاتل کو گزشتہ سال لیفٹیننٹ گورنر نے اچھے برتاؤ کی وجہ سے رہاکرنے کی منظوری بھی دےدی تھی اور وہ اب جیل سےباہر ہے۔

اپنی بہن جیسیکا لال کو انصاف دلانےکے لئے ان کی بہن سبرینا نے لمبی قانونی لڑائی لڑی اور وہ گزشتہ سال سے کچھ بیمار رہنے لگی تھیں۔ ان کے بھائی رنجیت لال نے ایجنسی کو سبرینا کے انتقال کی خبر دیتے ہوئے بتایا کہ سبرینا بیمار تھیں اوران کا ہسپتال آنا جانا رہتاتھا ۔ان کی طبیعت اچانک خراب ہوئی اور ان کو ہسپتال لےجایا گیا جہاں ایک دن بعد ان کا انتقال ہو گیا۔

سبرینا اپنی بہن کےکیس میں ایک پہچان بن گئی تھیں اور انہوں نےگزشتہ سال ایک انٹرویومیں کہا تھا کہ وہ خواتین کی مدد کرنے کےلئے اپنی بہن کی یاد میں ایک فاؤنڈیشن بنایئں گی۔انہوں نے کہا تھا کہ ان کی بہن جیسیکا بہت خوش مزاج اور مثبت سوچ والی لڑکی تھی اور اس کی کمی ہماری زندگی میں ہمیشہ محسوس کی جائےگی۔