راہل کی مودی کو ٹرمپ سے جلد گلے ملنے کی صلاح

نئی دہلی: کانگریس نائب صدر راہل گاندھی نے امریکی صدر ڈونلڈ ٹرمپ کے پاکستان کے تئیں تبدیل ہوتے موقف کے مدنظر وزیر اعظم نریندر مودی کو جلد سے جلد ٹرمپ کو گلے لگانے کی صلاح دی ہے۔راہل گاندھی نے کہا کہ وزیر اعظم کو کسی تاخیر کے بغیر اس سمت فوراً پہل کرنی چاہئے اور جلد ہی ٹرمپ سے گلے ملنا چاہئے ۔

کانگریس نائب صدر نے ٹوئیٹ کیاکہ ’’مودی جی جلدی کرو، لگتا ہے صدر ٹرمپ پھر سے گلے لگنا چاہتے ہیں۔ ‘‘ انھوں نے کہاکہ اس ٹوئیٹ کے ساتھ صدر ڈونلڈ ٹرمپ کا وہ ٹوئیٹ بھی پوسٹ کیا ہے جس میں انھوں نے کہا کہ ’’پاکستان اور اسکے رہنماؤں کے ساتھ پہلے سے زیادہ اچھے رشتے بنانے شروع کردئے ہیں۔ کئی موقعوں پر ملے انکے تعاون کے لئے انکا شکریہ اداکرتاہوں ۔‘‘

ایک دیگرٹوئیٹ میں راہل گاندھی نے پارٹی کارکنوں کو مہاراشٹر کے ناندیڑ کے بلدیاتی انتخابات میں کانگریس کو ملی زبردست فتح کے لئے مبارک باد دی ہے۔

دریں اثنا پارٹی نے بھی پنجاب کے گرداس پور لوک سبھا سیٹ پر ہوئے انتخاب میں پارٹی امیدوار سنیل جاکھڑ اور کیرالہ کی وینگارااسمبلی سیٹ پر کانگریس کی قیادت والے اتحاد کے امیدوار کی جیت پر خوشی ظاہر کی۔