مودی حکومت جموں و کشمیر کو تین حصوں میں تقسیم کرنے پر آمادہ!

خبر ہے کہ مودی حکومت جموں و کشمیر کو 3حصوں میں تقسیم کر سکتی ہے۔ جموں مکمل ریاست اور لداخ و کشمیر دو الگ یونین ٹیریٹریز یعنی مرکز کے ماتحت ریاست ہو سکتی ہیں۔ حالانکہ اس خبر کی ابھی تصدیق نہیں ہوئی ہے۔

تصویر سوشل میڈیا
تصویر سوشل میڈیا
user

قومی آوازبیورو

جموں و کشمیر میں حالات بہت تیزی کے ساتھ بدل رہے ہیں اور کئی طرح کے احکامات نے ایک الگ طرح کی سرگرمی اس ریاست میں پیدا کر دی ہے۔ جو کچھ وہاں ہو رہا ہے اس نے ملک بھر میں کئی طرح کی قیاس آرائیوں کا دور شروع کر دیا ہے۔ ریاست میں جاری امر ناتھ یاترا کے لیے پہلے 40 ہزار سیکورٹی فورسز کی تعیناتی ہوئی اور پھر اضافی 10 ہزار فوجیوں کو بھیجا گیا۔اسی درمیان 25 ہزار سیکورٹی فورسز وادی میں بھیجے جانے اور فوج و فضائیہ کو ہائی الرٹ پر رکھنے کو لے کر قیاس آرائیوں کا بازار گرم ہو گیا، پھر حکومت کے ذریعہ اچانک امرناتھ یاترا کو رَد کرتے ہوئے سبھی عقیدتمندوں و سیاحوں کو وادی خالی کرنے کا فرمان جاری کرنے سے صورت حال میں مزید سنگینی نظر آنے لگی۔

لیکن ان احکامات اور قیاس آرائیوں کے درمیان جو سب سے اہم اور فکرانگیز خبر ہوا میں تیر رہی ہے وہ یہ ہے کہ مرکزی حکومت جموں و کشمیر کو تین حصوں میں تقسیم کرنے جا رہی ہے۔ خصوصی ذرائع سے ملی جانکاری کے مطابق مرکزی حکومت انتخاب سے پہلے نئی حدبندی یا ریاست کی تقسیم کے بارے میں کوئی اعلان کر سکتی ہے۔ ذرائع کے مطابق حکومت جموں و کشمیر کو تین حصوں میں بانٹ سکتی ہے اور اس کے تحت جموں کو مکمل ریاست کا درجہ، لداخ کو مرکز کے ماتحت ریاست اور کشمیر کو ایک الگ ریاست کا اعلان کیا جا سکتا ہے۔


وادی کی ہوا میں یہ خبر بھی تیر رہی ہے کہ مودی حکومت کشمیر کو ایک الگ ریاست کا درجہ نہیں دے گی بلکہ صرف جموں کو مکمل ریاست کا درجہ ملے گا اور کشمیر و لداخ مرکز کے ماتحت دو الگ الگ ریاستیں ہو جائیں گی۔ حالانکہ ان خبروں کی کہیں سے کوئی تصدیق نہیں ہوئی ہے۔ لیکن حکومت نے جس طرح کے اقدام گزشتہ دنوں جموں و کشمیر کے تعلق سے اٹھائے ہیں، فضا میں قیاس آرائیوں کا بازار پوری طرح گرم ہے۔

اس کے علاوہ قیاس آرائیاں یہ بھی ہو رہی ہیں کہ حکومت آئین کے متنازعہ شق 35 اے کو ہٹانے کا فیصلہ سنانے جا رہی ہے۔ یہی شق جموں و کشمیر کے مقامی شہریوں کو متعارف کرتا ہے جو اسے ہندوستانی آئین کی شق 370 کے تحت خصوصی درجہ دیتا ہے۔ کہا جا رہا ہے کہ حکومت شق 35 اے کو ہٹانے کے پیش نظر ہی حالات سے نمٹنے کے لیے وادی میں اضافی سیکورٹی کے قدم اٹھا رہی ہے۔


اس پورے معاملے کو لے کر مرکزی حکومت کی جانب سے اب تک کچھ بھی صاف نہیں کیا گیا ہے۔ ایسے ماحول میں سوال اٹھ رہے ہیں کہ ایک کے بعد ایک ہو رہے واقعات محض اتفاق ہیں یا ان سب کے پیچھے کسی خاص طرح کا منصوبہ ہے۔ مرکزی حکومت نے ان سب کو لے کر ایک رازدارانہ خاموشی اختیار کر رکھی ہے جب کہ مقامی سطح پر افسران گول مول جواب دے کر غلط فہمی کو مزید بڑھا رہے ہیں اور کئی الگ الگ طرح کی قیاس آرائیوں کو جنم دے رہے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔