دہلی حکومت اور ایم سی ڈی کے غیر ذمہ دارانہ رویہ سے ڈینگی-ملیریا کے معاملات بے قابو: کانگریس

انیل چودھری نے کہا کہ اس مسئلے سے نمٹنے کے لیے ایم سی ڈی اور دہلی حکومت اہم اقدام اٹھانے کے بجائے ایک دوسرے پر الزام تراشی کی سیاست کر رہے ہیں۔

چودھری انیل
چودھری انیل
user

قومی آوازبیورو

نئی دہلی: دہلی میں ڈینگی کے پھیلاؤ اور بخار کے کیسز میں ہو رہے اضافہ کے درمیان ریاستی کانگریس نے ایم سی ڈی اور دہلی حکومت پر حملہ کرتے ہوئے کہا کہ یہ تشویشناک بات ہے کہ ڈینگی کے کیسز میں تیزی سے اضافہ ہو رہا ہے اور گزشتہ ہفتے کے مقابلے اس ہفتے دوگنے کیسز رپورٹ ہوئے ہیں۔

انیل چودھری نے کہا کہ اس مسئلے سے نمٹنے کے لیے ایم سی ڈی اور دہلی حکومت اہم اقدام اٹھانے کے بجائے ایک دوسرے پر الزام تراشی کی سیاست کر رہے ہیں۔ انیل چودھری اس سے پہلے بھی ایم سی ڈی اور دہلی حکومت پر ایک دوسرے پر الزام تراشی کی سیاست اور غیر ذمہ دارانہ رویہ اپنانے کا الزام لگا چکے ہیں۔


ریاستی کانگریس کے صدر انیل چودھری نے کہا کہ شہر میں جگہ جگہ کچرے کے ڈھیر اور ٹھہرا ہوا پانی مچھروں کی افزائش کی اہم وجوہات ہیں۔ ایم سی ڈی کی جانب سے فوگنگ اور ادویات کا چھڑکاؤ نہ کئے جانے کی وجہ سے شہر میں مچھروں کی تعداد میں اضافہ ہو رہا ہے، جس سے ڈینگی پھیل رہا ہے اور ملیریا کا خطرہ اور بھی بڑھ رہا ہے۔ سرکاری اسپتالوں میں ڈینگی کا مناسب علاج نہ ہونے اور مریضوں کو پلیٹ لیٹس دستیاب نہ ہونے کی وجہ سے مریض مناسب اور مہنگے علاج کے لیے نجی اسپتالوں میں جانے پر مجبور ہیں۔

انیل چودھری نے کہا کہ جب کانگریس دہلی میں برسراقتدار تھی تو اس اس وقت شہر کو صاف ستھرا رکھنے کے لیے بی جے پی کی حکمرانی والی ایم سی ڈی کے ساتھ مل کر کام کیا اور تہواروں کے موسم سے پہلے اور اس کے دوران ویکٹر سے پیدا ہونے والے انفیکشن کو روکنے کے لیے وسیع پیمانے پر فوگنگ کی، لیکن اس طرح کے تال میل کے ساتھ کام کرنے کا جذبہ میونسپل کارپوریشن اور دہلی حکومت میں دور دور نظر نہیں آتا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔