چین کی سرحد سے جوڑنےوالے ویلی برج کے انہدام کی جانچ شروع، مقدمہ درج

اتراکھنڈ میں پتھورہ گڑھ ضلع انتظامیہ نے اسٹریٹجک لحاظ سے اہم اور چین کی سرحد سے جوڑنے والے ویلی پل کے انہدام کی جانچ شروع کردی ہے۔ تفتیشی ٹیم منسیاری کے سب ڈویژنل آفیسر (ایس ڈی ایم) کی سربراہی میں تشکیل دی گئی ہے۔ دوسری طرف، اس معاملے میں قصوروار کمپنی کے خلاف مقدمہ درج کیا گیا ہے۔

یہ اطلاع پتھورہ گڑھ کے ضلع مجسٹریٹ ڈاکٹر وجئے کمار جوگدنڈے نے دی ہے۔ تحقیقاتی کمیٹی 15 دن میں ضلع کلیکٹر کو اپنی رپورٹ پیش کرے گی۔ ایگزیکٹو انجینئر اور اسسٹنٹ ڈویژنل ٹرانسپورٹ آفیسر کو بھی بطور ممبر کمیٹی میں شامل کیا گیا ہے۔

اس معاملے کو سنجیدگی سے لیتے ہوئے ضلعی مجسٹریٹ نے بارڈر روڈ آرگنائزیشن (بی آر او) کے عہدیداروں کو بھی ہدایت دی ہے کہ آئندہ اس طرح کے واقعات کو دوہرایا نہیں جانا چاہئے۔ ضلعی مجسٹریٹ کی جانب سے افسران کو ہدایت دی گئی ہے کہ وہ ہرموٹر برج کی صلاحیت ڈسپلے پر درج کرانے کے لیے اقدامات کریں۔

دریں اثناء، ویلی برج کی تعمیر نو کا کام بی آر او نے شروع کردیا ہے۔ یہ پل 15 دن میں دوبارہ تیار ہوجائے گا۔ بدھ کے روز ہند- تبت بارڈر پولیس کے ساتھ بی آر او کے عہدیداروں کی میٹنگ میں یہ اطلاع دی گئی ہے۔ میٹنگ میں آئی ٹی بی پی کی طرف سے بتایا گیا کہ سرحد پر تعینات فوجیوں کے لئے رسد بھیجنے کا کام باقائدہ کیا جا رہا ہے۔

قابل ذکر ہے کہ چین کی سرحد سے جوڑنے والے منسیاری۔ میلم روڈ پر سینر گڑھ کے نزدیک واقع ویلی برج دو روز قبل منہدم ہوگیا تھا۔ ایک پرائیویٹ کمپنی کی گاڑی ٹرک پر پوک لینڈ مشین لے کر وادی میلم کی طرف جارہی تھی۔ پل اتنا زیادہ بوجھ برداشت کرنے کی صلاحیت برداشت نہیں کرسکا اور ندی میں گرگیا۔ اس حادثے میں ٹرک اور پوکلینڈ مشین بھی دریا میں گر گئی تھی۔ بی آر او نے پرائیویٹ کمپنی کے خلاف آج مقدمہ دائر کیا ہے۔ یہ گاڑی چین کی سرحد سے متصل علاقے میں سڑکیں بنانے کیلئے بی آر او کو خدمات دینے والی پرائیویٹ کمپنی کی تھی۔