پرندے سے ٹکر کے بعد لڑکھڑایا انڈیگو کا طیارہ، ناگپور میں ایمرجنسی لینڈنگ، بال بال بچی 272 مسافروں کی جان

ناگپور ہوائی اڈے سے کولکاتا کے لیے اُڑان بھرنے والا انڈیگو ایئر لائنس کا ایک طیارہ منگل کو ایک بڑے حادثے کا شکار ہونے سے بال بال بچ گیا۔ اڑان بھرنے کے کچھ ہی منٹوں بعد طیارہ سے ایک پرندہ ٹکرا گیا، جس سے طیارہ کے آگے کے حصے کو نقصان پہنچا۔ پائلٹ کی وقت رہتے کی گئی کارروائی سے حادثہ ٹل گیا۔ فلائٹ میں سوار سبھی 272 مسافر پوری طرح محفوظ ہیں۔

موصولہ اطلاع کے مطابق پرندہ سے ٹکرانے کے بعد طیارہ لڑکھڑانے لگا۔ اس سے لوگوں میں ہنگامہ مچ گیا۔ سبھی لوگ بُری طرح گھبرا گئے اور دہشت میں آ گئے۔ اس دوران لوگوں سے پُرسکون رہنے کی اپیل کی گئی۔ پائلٹ نے اپنی سوجھ بوجھ کا استعمال کرتے ہوئے فوراً طیارے کی ناگپور ہوائی اڈے پر ایمرجنسی لینڈنگ کرائی۔ اس کے بعد مسافروں کو محفوظ طریقے سے باہر نکالا گیا۔

فلائٹ کے اندر موجود کچھ مسافروں نے بتایا کہ اڑان کے دوران زوردار جھٹکا محسوس ہوا۔ حالانکہ پائلٹ نے حالت کو قابو میں کرتے ہوئے کسی بھی طرح کی افرا تفری نہیں مچنے دی۔ مسافروں کے تحفظ کو دیکھتے ہوئے فلائٹ کو گراؤنڈ کر دیا گیا ہے۔

طیارے کی ایمرجنسی لینڈنگ کے بعد اب سینئر ایئر پورٹ ڈائرکٹر عابد روحی کا بیان سامنے آیا ہے۔ انہوں نے کہا ہے کہ انڈیگو کی ناگپور کولکاتا اڑان نمبر 6E812 پر پرندہ کے ٹکرانے کا خدشہ ہے۔ ہم واقعہ کی جانچ کر رہے ہیں۔ تفصیلی جانکاری جلد ہی ساجھا کی جائے گی۔

قابل ذکر ہے کہ طیارے سے پرندوں کے ٹکرانے کو ایوی ایشن انڈسٹری میں ایک سنگین خطرے کے طور پر دیکھا جاتا ہے۔ خاص طور پر ٹیک آف اور لینڈنگ کے وقت۔ کئی مرتبہ انجن میں پرندے کے پھنسنے سے تکنیکی خرابی آ سکتی ہے جو طیارے کے آپریشن کو خطرے میں ڈال سکتی ہے۔