انڈیگو بحران: آج بھی 500 پروازیں منسوخ، ایئرپورٹ پر مسافر بے حال، شہری ہوابازی کے وزیر نے کہا ’سخت کارروائی کی جائے گی‘

ملک کی سب سے بڑی ایئرلائن انڈیگو کی پرواز خدمات میں رخنہ ہنوز جاری ہے۔ 8 دسمبر کو بھی انڈیگو نے 500 پروازیں منسوخ کر دی ہیں اور پورے دن میں 1802 مسافر طیاروں کے پرواز کا منصوبہ ہے۔ یہ اطلاع شہری ہوابازی کی وزارت نے دی ہے۔ اس درمیان وزارت نے بتایا کہ انڈیگو نے پیر کی دوپہر تک 4500 بیگ ڈیلیور کیے ہیں اور آئندہ 36 گھنٹوں میں مسافروں کے بقیہ 4500 بیگ ڈیلیور کرنے کا ہدف ہے۔

شہری ہوابازی کی وزارت نے یہ بھی کہا کہ ’’آج (پیر) انڈیگو نے 138 میں سے 137 منزلوں کے لیے 1802 پروازوں کو چلانے کا منصوبہ بنایا ہے۔ اس کی 500 پروازیں منسوخ ہوئی ہیں۔‘‘ ساتھ ہی وزارت نے بتایا کہ یکم سے 7 دسمبر تک کے لیے بک کیے گئے 586705 ٹکٹوں کے پی این آر منسوخ کر دیے گئے اور ان کے پیسے لوٹا دیے گئے۔ اس کی مجموعی رقم 569.65 کروڑ روپے ہے۔

راجیہ سبھا میں پیر کو شہری ہوابازی کے مرکزی وزیر رام موہن نائیڈو نے کہا کہ ’’حکومت نے انڈیگو کی بڑے پیمانے پر پروازوں کی منسوخ کے متعلق تحقیقات شروع کر دی ہے۔ ایئرلائن کے خلاف سخت کارروائی کی جائے گی تاکہ دیگر ایئرلائنز کے لیے ایک مثال قائم کی جا سکے۔‘‘ ایوان بالا میں وقفۂ سوالات کے دوران ایک ضمنی سوال کا جواب دیتے ہوئے نائیڈو نے انڈیگو ایئرلائن کو اس کے روزانہ کے آپریشن کے دوران کریو ممبر اور ڈیوٹی روسٹر کو منظم کرنے میں ناکام قرار دیا۔ انہوں نے کہا کہ ہم اس صورتحال کو ہلکے میں نہیں لے رہے ہیں، ہم تحقیقات کر رہے ہیں۔

دوسری جانب انڈیگو کی سیکڑوں پروازوں کی منسوخی کے سبب متاثرہ لوگوں کو راحت دینے کے لیے مرکزی حکومت کو ہدایت دینے کا مطالبہ والی ایک عرضی دہلی ہائی کورٹ میں بھی داخل کی گئی ہے۔ دہلی ہائی کورٹ کا کہنا ہے کہ انڈیگو پرواز منسوخی کے متعلق داخل کی گئی عرضی بدھ (10 دسمبر) کو سماعت کے لیے درج کی جائے گی۔