ووٹر لسٹ نظر ثانی معاملے پر عوام میں بیداری پیدا کرنے کی ضرورت : راہل گاندھی

بہار اسمبلی انتخابات میں ویسے تو پہلے سے ہی گرمی محسوس کی جا رہی تھی لیکن ووٹر لسٹ کی نظر ثانی معاملے نے اس کو اور گرما دیا ہے۔کل بہار اسمبلی انتخابات کے سلسلے میں کانگریس پارٹی نے دہلی اندرا بھون میں تین گھنٹے سے زیادہ طویل میٹنگ کی۔ اس میٹنگ میں بہار کانگریس کے بڑے لیڈران شریک رہے۔ میٹنگ میں بہار اسمبلی انتخابات سے متعلق کئی امور پر تبادلہ خیال ہوا، جس میں ووٹر لسٹ کی نظرثانی پر کانگریس ہائی کمان نے خاص زور دیا۔

پارٹی ذرائع کے مطابق راہل گاندھی نے بہار کانگریس کے رہنماؤں کو ہدایت دی کہ ووٹر لسٹ کی نظرثانی کے معاملے میں عوام کو بیدار کریں اور عوام کے ساتھ مل کر ایک عوامی تحریک تیار کریں۔ راہل گاندھی نے بہار کانگریس کے رہنماؤں کو یقین دلایا کہ کانگریس پارٹی کی اعلیٰ قیادت آپ کے ساتھ ہے۔

کانگریس کی اس میٹنگ میں پورنیہ سے رکن پارلیمنٹ پپو یادو بھی شریک رہے۔ رکن پارلیمنٹ پپو یادو نے میٹنگ میں کانگریس پارٹی کا موقف رکھتے ہوئے کہا کہ راہل گاندھی کے دوروں سے بہار میں عظیم اتحاد (گرینڈ الائنس) کے لیے سازگار ماحول بنا ہے۔ بی جے پی کو بہار میں کیسے روکا جائے اس پر راہل گاندھی سے گفتگو ہوئی ہے۔