زرمبادلہ کے ذخائر میں پھر کمی، خزانے میں اب اتنے ارب ڈالر رہ گئے!

ایک ہفتے کی راحت کے بعد ہندوستان کے زرمبادلہ کے ذخائر میں ایک بار پھر کمی ہوئی ہے۔ جمعہ کو ریزرو بینک کی طرف سے جاری کردہ تازہ ترین اعداد و شمار کے مطابق، ہندوستان کے زرمبادلہ کے ذخائر اب کم ہو کر 616.14 بلین ڈالر پر آ گئے ہیں۔

ریزرو بینک ہر ہفتے کے آخر میں زرمبادلہ کے ذخائر کے تازہ ترین اعداد و شمار جاری کرتا ہے۔ یہ اعداد و شمار 19 جنوری کو ختم ہونے والے ہفتے کا ہے۔ اعداد و شمار کے مطابق گزشتہ ہفتے کے دوران ذخائر میں 2.79 ارب ڈالر کی کمی ہوئی، اس سے قبل 12 جنوری کو ختم ہونے والے ہفتے کے دوران زرمبادلہ کے ذخائر 1.6 ارب ڈالر اضافے سے 618.94 ارب ڈالر تک پہنچ گئے تھے۔

ریزرو بینک کے ہفتہ وار شماریاتی ضمیمہ کے مطابق گزشتہ ہفتے کے دوران غیر ملکی کرنسی کے اثاثوں میں سب سے بڑی کمی آئی ہے۔ غیر ملکی کرنسی کے اثاثے اب 2.6 بلین ڈالر کم ہو کر 545.8 بلین ڈالر ہو گئے ہیں۔ ڈالر کے مقابلے میں مختلف بڑی غیر ملکی کرنسیوں کی قیمتوں میں اتار چڑھاؤ سے غیر ملکی کرنسی کے اثاثے بھی متاثر ہوتے ہیں۔ ریزرو بینک یورو، پاؤنڈ، ین اور دیگر بڑی کرنسیوں کے ذخائر کو ڈالر کے حساب سے شمار کرتا ہے، جس کی وجہ سے شرح تبادلہ کا اس پر براہ راست اثر پڑتا ہے۔

زرمبادلہ کے ذخائر میں غیر ملکی کرنسی اثاثوں کا سب سے بڑا حصہ ہے۔ اگر ہم زرمبادلہ کے ذخائر کے دیگر اجزاء پر نظر ڈالیں تو سونے کے ذخائر میں 34 ملین ڈالر کی کمی ہوئی اور یہ ذخائر 47.2 بلین ڈالر پر آ گئے۔ اسی طرح خصوصی ڈرائنگ رائٹس بھی گزشتہ ہفتے کے دوران 476 ملین ڈالر کم ہو کر 18.2 بلین ڈالر رہ گئے۔ اس عرصے کے دوران انٹرنیشنل مانیٹری فنڈ کے پاس رکھے گئے ذخائر میں 18 ملین ڈالر کی کمی ہوئی اور یہ 4.85 بلین ڈالر رہ گئی۔

ہندوستان کے زرمبادلہ کے ذخائر ایک وقت میں 650 بلین ڈالر کی ریکارڈ سطح کے بہت قریب پہنچ چکے تھے۔ اکتوبر 2021 میں ہندوستان کے زرمبادلہ کے ذخائر 645 بلین ڈالر تھے جو کہ اب تک کی بلند ترین سطح ہے۔ غیر ملکی کرنسیوں کی شرح تبادلہ کے علاوہ دیگر عوامل بھی زرمبادلہ کے ذخائر کو متاثر کرتے ہیں۔ کئی بار روپے کو برقرار رکھنے کے لیے ریزرو بینک اپنے ذخائر سے ڈالر نکال کر مارکیٹ میں ڈال دیتا ہے۔ ماضی میں روپے کی گرتی ہوئی قیمت کوروکنے کے لیے ریزرو بینک کو کئی مواقع پر مداخلت کرنے کی ضرورت پڑی۔ (نیو ز پورٹل’اے بی پی‘ کے انپٹ کےساتھ)