ہندوستان کا ایران امریکہ جنگ میں پرامن حل تلاش کرنے کے لئے سفارت کاری پر زور

ہندوستانی وزارت خارجہ نے مغربی ایشیا کی بگڑتی ہوئی صورتحال پر تشویش کا اظہار کرتے ہوئے تمام فریقین پر زور دیا کہ وہ تحمل کا مظاہرہ کریں۔ اس نے تنازعہ کا دیرپا اور پرامن حل تلاش کرنے کے لیے بات چیت اور سفارت کاری پر بھی زور دیا۔ وزارت خارجہ کا یہ بیان امریکہ اور ایران کے درمیان بڑھتی ہوئی کشیدگی کے درمیان آیا ہے۔

ہندوستانی  وزارت خارجہ نے کہا کہ "ہندوستان کو مغربی ایشیا میں حالیہ حملوں اور کشیدگی پر تشویش ہے۔ سمندری راستوں سے تجارتی بحری جہازوں کو نشانہ بنانے سے کشیدگی میں مزید اضافہ ہوا ہے۔ یہ واقعات پورے خطے میں امن، سلامتی اور استحکام کے لیے خطرہ ہیں۔ ہندوستان تمام فریقوں سے تحمل کا مظاہرہ کرنے، کشیدگی کو کم کرنے اور شہریوں کی حفاظت کو یقینی بنانے کی اپیل کرتا ہے۔" اس کے علاوہ تیل اور توانائی کی سپلائی اور تجارت میں کسی قسم کی رکاوٹ پیدا نہ ہونے دیں۔ اس تنازعہ کا پرامن اور دیرپا حل تلاش کرنے کے لیے بات چیت اور سفارت کاری سے رجوع کریں۔

کل یعنی 8 جولائی کو ایران کی جانب سے آبنائے ہرمز میں تجارتی بحری جہازوں کو نشانہ بنانے کے بعد امریکہ نے ایران کے 80 فوجی اڈوں کو نشانہ بنانے کا دعویٰ کیا۔ دریں اثنا، ایران کی  آئی آر جی سی نے 85 امریکی اڈوں کے خلاف جوابی کارروائی کرنے کا دعویٰ بھی کیا ہے۔ ایرانی فوج نے دعویٰ کیا ہے کہ اس نے جنوبی ایران پر امریکی حملوں کے جواب میں بحرین میں شیخ عیسیٰ ایئر بیس پر تعینات امریکی افواج کو نشانہ بناتے ہوئے ڈرون حملہ کیا۔

امریکی صدر ڈونالڈ ٹرمپ نے انقرہ میں نیٹو سربراہی اجلاس کے دوران ایران کے ساتھ ایم او یو کے خاتمے کی بات کی۔ ٹرمپ نے کہا، "ان کے ساتھ کچھ غلط ہے۔ وہ بیمار ہیں اور گندا کھیل کھیل رہے ہیں۔" تاہم، ٹرمپ نے یہ بھی کہا کہ وہ اپنے مذاکرات کاروں کو بات چیت جاری رکھنے کی اجازت دے سکتے ہیں، لیکن انہیں لگتا ہے کہ وہ (ایران) صرف وقت ضائع کر رہے ہیں۔ ایک اور بیان میں، انہوں نے یہ بھی کہا کہ امریکہ بدھ کی رات یعنی 8 جولائی کو "شاید" ایران پر دوبارہ حملہ کرے گا۔ ٹرمپ نے دھمکی دی کہ امریکہ ایرانی شہری انفراسٹرکچر پر حملہ کر سکتا ہے اور جزیرہ کھرگ پر قبضہ کرنے کی کوشش کر سکتا ہے۔