رانچی ونڈے میں ہندوستان کی جنوبی افریقہ پر شاندار جیت، کوہلی کی سنچری، کلدیپ کی نمایاں کارکردگی
رانچی میں پہلے ونڈے میں ہندوستان نے جنوبی افریقہ کو 17 رنز سے شکست دی۔ وراٹ کوہلی نے شاندار 135 رنز بنائے جبکہ کلدیپ یادو نے 4 وکٹیں حاصل کیں۔ اس جیت سے ہندوستان نے سیریز میں 1-0 کی برتری حاصل کر لی
رانچی میں کھیلے گئے تین میچوں کی ونڈے سیریز کے افتتاحی مقابلے میں ہندوستان نے جنوبی افریقہ کو 17 رنز سے شکست دے کر شاندار آغاز کیا اور سیریز میں 1-0 کی برتری حاصل کر لی۔ ٹیم انڈیا نے پہلے بیٹنگ کرتے ہوئے 350 رنز کا بڑا ہدف کھڑا کیا، جس کی بنیاد وراٹ کوہلی کی شاندار سنچری نے رکھی۔ کوہلی نے 135 رنز کی دلکش اننگ کھیلی، جبکہ روہت شرما اور کے ایل راہل نے بھی اہم کردار ادا کیا۔
میچ کے ابتدا میں ہندوستان کو جلد ہی یشسوی جیسوال کے آؤٹ ہونے پر جھٹکا لگا لیکن اس کے بعد روہت اور کوہلی نے نہ صرف اننگ کو سنبھالا بلکہ جارحانہ کھیل پیش کرتے ہوئے 136 رنز کی شراکت قائم کی۔ روہت نے 57 رنز بنائے اور اپنی اننگ کے دوران شاہد آفریدی کا چھکوں کا ریکارڈ بھی توڑ دیا۔ وراٹ کوہلی نے تیز رفتاری سے نصف سنچری مکمل کی اور بعد میں 11 چوکوں اور 7 چھکوں کی مدد سے 135 رنز کی شاندار اننگ کھیل کر ٹیم کو مضبوط مقام تک پہنچایا۔ آخری مرحلے میں کے ایل راہل کے 60 رنز نے اسکور کو 350 تک پہنچانے میں اہم کردار ادا کیا۔
جواب میں جنوبی افریقہ کی شروعات انتہائی کمزور رہی۔ دوسرے ہی اوور میں ہرشت رانا نے ریکلٹن اور کوئنٹن ڈی کوک کو آؤٹ کر کے ہندوستان کو زبردست برتری دلائی۔ پانچویں اوور میں مارکرام بھی عرشدیپ سنگھ کا شکار بنے۔ اگرچہ درمیان میں بریوز، جانسن اور بریٹسکے نے مزاحمت دکھاتے ہوئے اسکور کو آگے بڑھایا لیکن ہندوستانی بولرز نے دباؤ برقرار رکھا۔
کلدیپ یادو نے انتہائی اہم مواقع پر وکٹیں حاصل کر کے جنوبی افریقہ کی پیش قدمی روک دی۔ انہوں نے 4 وکٹیں لے کر جنوبی افریقہ کی بیٹنگ لائن اپ کو مسلسل جھٹکے دیے۔
ہرشت رانا نے 3 وکٹیں، عرشدیپ نے 2 جبکہ پرسدھ کرشنا نے ایک وکٹ حاصل کی۔ ایک موقع پر جانسن اور بریٹسکے کی 97 رنز کی شراکت نے میچ میں سنسنی پیدا کی لیکن کلدیپ نے دونوں کو جلدی پویلین بھیج کر ہندوستان کی گرفت مضبوط کر دی۔
آخری اوور میں جنوبی افریقہ کو 18 رنز درکار تھے مگر پرسدھ کرشنا نے بوش کو آؤٹ کر کے میچ ختم کر دیا۔ پوری ٹیم 332 رنز پر آؤٹ ہو گئی اور ہندوستان نے رانچی میں شاندار جیت درج کر لی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔