کشمیر میں سخت سیکورٹی انتظامات کے سائے میں یوم آزادی تقاریب منعقد

سری نگر: وادی کشمیر میں اتوار کو ملک کے 75 ویں یوم آزادی کی تقریبات سخت سیکورٹی بندوبست کے بیچ منائی گئیں۔ اس موقع پر سب سے بڑی تقریب گرمائی دارالحکومت سری نگر میں واقع شیر کشمیر کرکٹ اسٹیڈیم میں منعقد ہوئی، جہاں یونین ٹریٹری کے لیفٹیننٹ گورنر منوج سنہا نے پرچم کشائی کی۔ وادی کشمیر میں امسال یوم آزادی کے موقع پر موبائل انٹرنیٹ خدمات معطل نہیں کی گئیں۔ کشمیر زون پولیس کے انسپکٹر جنرل وجے کمار نے پہلے ہی اعلان کیا تھا کہ یوم آزادی کے موقع پر انٹرنیٹ خدمات معطل ہوں گی نہ ہی لوگوں کی آزادانہ نقل وحرکت پر کوئی پابندیاں۔

تاہم امسال بھی یوم آزادی کے موقع پر وادی بھر میں سناٹا چھایا رہا۔ کاروباری سرگرمیاں معطل رہیں اور سڑکیں سنسان نظر آئیں۔ جموں و کشمیر حکومت نے 'آزادی کا امرت مہا اتسو' کے ایک حصے کے طور پر سبھی تعلیمی اداروں کو یوم آزادی کے موقع پر ترنگا لہرانے کی ہدایت دی تھی۔ جنوبی ضلع پلوامہ کے ترال میں واقع گورنمنٹ گرلز ہائر سکینڈری سکول میں منعقدہ یوم آزادی کی تقریب کے موقع پر اسکول کے پرنسپل مظفر وانی، جو حزب المجاہدین کے مہلوک کمانڈر برہان وانی کے والد ہیں، نے ترنگا لہرایا۔

لیفٹیننٹ گورنر منوج سنہا کڑے سیکورٹی بندوبست کے بیچ راج بھون سے ہائی سیکورٹی زون علاقہ سونہ وار میں واقع شیر کشمیر کرکٹ اسٹیڈیم پہنچے اور پرچم کشائی کے بعد وہاں موجود شرکاء سے خطاب کیا۔ شیر کشمیر اسٹیڈیم میں منعقدہ تقریب میں بہت کم تعداد میں شرکا موجود تھے جنہوں نے کورونا وبا کے پیش نظر گائیڈ لائنز پر عمل کرتے ہوئے فیس ماسک بھی لگا رکھے تھے اور وہ سماجی فاصلے کا خیال رکھتے ہوئے ایک کے بعد ایک سیٹ پر بیٹھے تھے۔

تقریب کے بحسن و خوبی انجام پذیر ہونے کو ممکن بنانے کے لئے ڈرونز کا استعمال کیا گیا نیز نزدیک میں واقع سلیمان ٹینگ پہاڑی پر ماہر نشانہ بازوں کو تعینات کیا گیا تھا۔ یوم آزادی کی تقریبات کے احسن انعقاد اور ملی ٹنٹوں کی طرف سے حملوں کے منصوبوں کو ناکام بنانے کے لئے اتوار کو وادی بھر میں سیکورٹی فورسز ہائی الرٹ پر تھے۔ سری نگر میں یوم آزادی کی تقریب کو پرامن طریقے سے انجام دینے کے لئے ڈرونز کا بھی استعمال کیا گیا اور حساس علاقوں میں فقیدالمثال سیکورٹی بندوبست کیا گیا تھا۔ سری نگر میں جگہ جگہ پر ناکے بٹھائے گئے تھے جو آنے جانے والوں کی تلاشی اور ضروری پوچھ گچھ کرتے تھے۔

اسٹیڈیم کی طرف آنے والی سڑکوں کو سیل کر دیا گیا تھا اور سری نگر کے حساس علاقوں میں سیکورٹی کے سخت انتظامات کئے گئے تھے اور جگہ جگہ پر ناکے بٹھائے گئے تھے جن پر تعینات سیکورٹی اہلکار ہر آنے جانے والوں کی تلاشی اور ضروری پوچھ گچھ کرتے تھے۔ سیول لائنز علاقوں میں سیکورٹی فورسز کے سینئر افسروں کو بھی گشت کرتے ہوئے دیکھا گیا اور بھاری تعداد میں سیکورٹی فورسز اہلکار تعینات کئے گئے تھے۔

یو این آئی اردو کے ایک نامہ نگار جنہوں نے اتوار کی صبح سری نگر کے کچھ علاقوں کا دورہ کیا کو کئی مقامات پر ناکہ لگائے سیکورٹی فورسز کو اپنا شناختی کارڈ دکھانا پڑا جس کے بعد ہی ان کو آگے بڑھنے کی اجازت دی گئی۔ وادی کے دیگر ضلع صدر مقامات میں بھی یوم آزادی کی تقاریب کے احسن انعقاد کے لئے سیکورٹی کے سخت انتظامات کئے گئے تھے اور صدر مقامات میں داخل ہونے والے پوائنٹس پر ناکے لگائے گئے تھے۔