دہلی: روہنی کورٹ احاطہ میں ایک بار پھر گولیوں کی گونج، پولیس تفتیش شروع

راجدھانی دہلی میں روہنی کورٹ کے باہر جمعہ کے صبح ہاتھا پائی کے دوران ایک سیکورٹی گارڈ نے گولی چلا دی۔ ایک وکیل نے اس تعلق سے بتایا کہ ’’واقعہ صبح تقریباً 10 بجے پیش آیا۔ روہنی کورٹ گیٹ کے باہر ایک وکیل اور سیکورٹی گارڈ کے درمیان بحث ہو گئی تھی جس کے بعد گولیاں چل گئیں۔‘‘

بتایا جا رہا ہے کہ سیکورٹی گارڈ اور وکیل کے درمیان توتو، میں میں اتنی زیادہ بڑھ گئی کہ وہاں پر مزید دو تین وکیل پہنچ گئے۔ سبھی کے درمیان ہو رہی بات چیت نے جلد ہی پرتشدد شکل اختیار کر لی۔ اسی درمیان گارڈ نے گولی چلا دی۔ اس واقعہ میں حالانکہ کوئی زخمی نہیں ہوا ہے، لیکن وہاں پر افرا تفری کا ماحول پیدا ہو گیا۔

روہنی کورٹ احاطہ میں گولی باری کی خبر ملنے کے بعد پولیس فوراً وہاں پہنچی اور جانچ کا عمل شروع کر دیا۔ آس پاس موجود لوگوں اور عینی شاہدین سے پوچھ تاچھ کی جا رہی ہے۔ پولیس خصوصاً یہ پتہ کرنے کی کوشش کر رہی ہے کہ آخر یہ گولی باری اچانک ہوئی، یا پھر کسی منصوبہ بندی کے تحت یہ عمل انجام دیا گیا۔ پولیس کے ذریعہ گولی چلانے والے ملزمین کی بھی تلاش کی جا رہی ہے۔