کورونا فرانس کو تباہ و برباد کرنے کے درپے، ایک دن میں 4,64,769 نئے معاملے درج

فرانس کی پبلک ہیلتھ ایجنسی کا کہنا ہے کہ 3881 کورونا مریضوں کا آئی سی یو میں علاج کیا جارہا ہے جو کہ فرانسیسی طبی نظام کی حالیہ صلاحیت کا 70 فیصد سے زیادہ ہے۔

ایفل ٹاور فرانس، تصویر آئی اے این ایس
ایفل ٹاور فرانس، تصویر آئی اے این ایس
user

یو این آئی

پیرس: فرانس میں ایک دن میں کورونا وائرس (کووڈ 19) انفیکشن کے 464769 نئے معاملے درج کئے گئے ہیں۔ جس نے ایک دن پہلے کے 368149 نئے معاملوں کا روزانہ ریکارڈ توڑ دیا۔ ملک کی پبلک ہیلتھ ایجنسی نے یہ اطلاع دی ہے۔ ہیلتھ ایجنسی نے منگل کو کہا کہ 3881 کورونا مریضوں کا آئی سی یو میں علاج کیا جارہا ہے جو کہ فرانسیسی طبی نظام کی حالیہ صلاحیت کا 70 فیصد سے زیادہ ہے۔

فرانس کے وزیراعظم جین کیسٹیکس نے وبا کی مار سے دوچار کمپنیوں کو سرکاری مدد فراہم کرنے والے دو نئے اقدامات کا اعلان کیا ہے۔ انہوں نے کہا کہ پہلے قدم سے 250 سے کم ملازمین والی ان چھوٹی کمپنیوں کو مدد ملے گی، جنہوں نے دسمبر 2021 اور جنوری 2022 کے درمیان اپنے کاروبار کا 30 فیصد کا نقصان برداشت کیا ہے۔ جس میں ان کے سماجی تعاون کو 20 فیصد کور کرنے کا منصوبہ ہے۔


دوسرا قدم ان کمپنیوں کے لئے ہے جنہیں اپنے کل ٹرن اوور کا 65 فیصد سے زیادہ نقصان ہوا اور ملازمین کو پارٹ ٹائم کام کرنے کے لئے کہا ہے۔ ایسی کمپنیوں کو پارٹ ٹائم ملازمین رکھنے کے لئے دینے والی ادائیگی میں راحت ملے گی اور انہیں ان کے سماجی تعاون کی ادائیگی کے 20 فیصد کے برابر مدد ملے گی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔