'اگر پائلٹ کی تربیت ملک کے کام آ سکے تو حاضر ہوں'، آپریشن سندور کے بعد تیج پرتاپ یادو کا جذباتی بیان

پاکستان میں دہشت گردوں کے ٹھکانوں پر ہندوستانی فضائیہ کی جانب سے ’آپریشن سندور‘ کے تحت کی گئی کارروائی کے بعد پورے ملک میں حب الوطنی کا ماحول ہے۔ اس پس منظر میں راشٹریہ جنتا دل (آر جے ڈی) کے رہنما اور بہار کے سابق وزیر اعلیٰ لالو پرساد یادو کے بیٹے تیج پرتاپ یادو کا ایک جذباتی بیان سامنے آیا ہے، جو سوشل میڈیا پر تیزی سے وائرل ہو رہا ہے۔

تیج پرتاپ یادو نے اپنے سوشل میڈیا پلیٹ فارم ایکس (سابقہ ٹوئٹر) پر لکھا، ’’اگر میری پائلٹ ٹریننگ ملک کے کسی کام آ سکتی ہے، تو میں تیج پرتاپ یادو ہر وقت ملک کی خدمت کے لیے تیار ہوں۔ میں نے بھی پائلٹ کی تربیت حاصل کی ہے اور اگر ملک کے لیے جان بھی چلی جائے تو خود کو خوش نصیب سمجھوں گا۔ جے ہند!‘‘ انہوں نے اس پیغام کے ساتھ اپنے تربیتی دنوں کی ایک تصویر اور پائلٹ لائسنس کی فوٹو بھی شیئر کی ہے۔

واضح رہے کہ تیج پرتاپ یادو نے بہار فلائنگ انسٹی ٹیوٹ سے باقاعدہ پائلٹ کی تربیت حاصل کی ہے۔ وہ سوشل میڈیا پر کافی سرگرم رہتے ہیں اور اکثر قومی اور سماجی مسائل پر اپنی رائے ظاہر کرتے ہیں۔

پہلگام حملے میں 26 شہریوں کی ہلاکت کے بعد ہندوستان نے جوابی کارروائی کرتے ہوئے پاکستان اور پاکستان مقبوضہ کشمیر (پی او کے) میں دہشت گردوں کے کئی تربیتی مراکز کو نشانہ بنایا۔ فوجی ذرائع کے مطابق ’آپریشن سندور‘ ایک مکمل انٹیلی جنس بیسڈ اور ٹارگٹڈ اسٹرائیک تھی جس میں درجنوں دہشت گرد مارے گئے۔

تیج پرتاپ یادو نے اس کارروائی کی کھل کر حمایت کی اور کہا کہ وہ ہر محاذ پر ملک کے ساتھ کھڑے ہونے کو تیار ہیں۔ ان کے بیان کو سوشل میڈیا پر بڑے پیمانے پر سراہا جا رہا ہے۔ لوگوں نے ان کے جذبے اور حب الوطنی کو خراج تحسین پیش کیا ہے اور اس وقت جبکہ سرحدی صورتحال نازک ہے، تیج پرتاپ یادو کی جانب سے دیے گئے اس پیغام کو ایک مثبت علامت کے طور پر دیکھا جا رہا ہے۔