میں مودی سے نفرت نہیں کرتا: راہل

شجالپور: کانگریس صدر راہل گاندھی نے آج کہا ہے کہ وہ وزیراعظم نریندر مودی سے نفرت نہیں کرتے ہیں۔ راہل گاندھی نے مدھیہ پردیش کے دیواس پارلیمانی حلقہ کے تحت آنے والے شجالپور میں انتخابی جلسہ سے خطاب کرتے ہوئے اپنی اس رائے کا اظہار کیا۔ اس موقع پر مدھیہ پردیش کے وزیراعلی کمل ناتھ اور چھتیس گڑھ کے وزیراعلی بھوپیش بگھیل بھی موجود تھے۔

راہل گاندھی نے اپنی تقریباً 25 منٹ کی تقریر کے آخر میں کہا کہ نریندر مودی بھلے ہی ان سے (راہل گاندھی) کتنی بھی نفرت کر لیں۔ ان کے خاندان والوں کے بارے میں بولیں۔ لیکن وہ مودی سے نفرت نہیں کرتے ہیں۔

انہوں نے فلسفیانہ انداز میں کہا کہ نفرت کو نفرت نہیں کاٹ سکتی ہے۔ نفرت کے ساتھ مودی کو نہیں ہرایا جاسکتا ہے۔ مودی کو صرف پیار سے ہرایا جاسکتا ہے۔ راہل گاندھی نے کہا کہ جتنی مرتبہ آپ (مودی) نفرت کریں گے اتنی ہی مرتبہ وہ جھپّی دیں گے اور گلے ملیں گے۔

اس سے پہلے راہل گاندھی نے رافیل طیارہ کا معاملہ بھی اٹھایا۔ کانگریس صدر نے کہا کہ انہوں نے تو رافیل کے بارے میں دریافت کیا تھا لیکن ان کے خاندان کے بارے میں کہا جانے لگا۔

انہوں نے الزام لگاتے ہوئے کہا کہ بی جے پی اور راشٹریہ سوئم سیوک سنگھ (آر ایس ایس) کے دل میں نفرت ہے۔ لیکن ہم میں نفرت نہیں ہے۔ مودی ان کے والد، دادی اور دیگر اہل خاندان کے بارے میں نفرت اور غصے میں بولتے ہیں۔ لیکن وہ ان کے (مودی کے) گلے لگ جاتے ہیں۔

انہوں نے مودی سے درخواست کی کہ وہ نفرت مٹائیں گے تو اس سے ان کا ہی فائدہ ہوگا۔ کانگریس صدر نے نوٹ بندی اور جی ایس ٹی جیسے مسائل کے سلسلے میں مرکز کی مودی حکومت کی پالیسیوں کی جم کر تنقید کی۔ انہوں نے کہا کہ کانگریس کی حکومت آنے پر ملک کی معیشت کو پٹری پر لائی جائے گی اور روزگار پر بھی خصوصی توجہ مرکوز کرے گی۔