ناسک میں کار اور موٹر سائیکل کی خوفناک ٹکر، حادثے میں 7 افراد کی موت
رات 11.57 بجے وانی-ڈنڈوری روڈ پر ایک نرسری کے قریب سڑک حادثہ پیش آیا۔ ٹکر کے بعد دونوں گاڑی نہر میں گر گئے۔ حادثے میں 3 خواتین، 3 مرد اور ایک بچے کی موت ہوئی ہے۔

سڑک حادثہ / یو این آئی
مہاراشٹر کے ناسک ضلع میں ایک خوفناک سڑک حادثہ پیش آیا ہے۔ یہاں کار اور موٹر سائیکل کی شدید ٹکر میں 7 لوگوں کی موت ہو گئی جبکہ 2 دیگر افراد شدید طور پر زخمی ہو گئے۔ مہلوکین میں 3 مرد اور 3 خواتین کے علاوہ 2 سال کا ایک بچہ بھی شامل ہے۔ پولیس کے مطابق یہ دردناک حادثہ بدھ کی دیر رات ڈنڈوری قصبے کے قریب ہوا۔
ایک پولیس افسر نے بتایا کہ رات 11.57 بجے وانی-ڈنڈوری روڈ پر ایک نرسری کے پاس سڑک حادثہ کی اطلاع ملی تھی۔ جب پولیس موقع پر پہنچی تو دونوں گاڑی سڑک کنارے ایک چھوٹی نہر میں گرے ہوئے تھے۔ پولیس نے بتایا کہ حادثے میں 7 لوگوں کی موت ہو گئی۔ اس کے بعد پولیس ٹیم اور دیگر ایجنسیوں کے ذریعہ راحت و بچاؤ مہم شروع کی گئی۔
دونوں گاڑیوں کو نہر سے نکالنے کے ساتھ ہی لاشوں کو پوسٹ مارٹم کے لیے بھیجا گیا۔ زخمیوں کو سنگین حالت میں قریب کے اسپتال میں داخل کرایا گیا۔ ایس پی نے بتایا کہ حادثے کی وجوہات کی جانچ کی جا رہی ہے اور واقعہ سے جڑے سبھی تکنیکی پہلوؤں پر بھی نظر رکھی جا رہی ہے۔
اس دردناک حادثے کے بعد پورے علاقے میں سوگ کی لہر دوڑ گئی ہے۔ بتایا جاتا ہے کہ اس سڑک پر پہلے بھی کئی حادثات ہو چکے ہیں، جس سے مقامی لوگوں نے انتظامیہ سے یہاں ٹریفک کنٹرول اور سڑک تحفظ سے متعلق اقدامات کرنے کا مطالبہ کیا ہے۔
مہلوکین کی شناخت دیوی داس پنڈت گانگرڈے (28)، منیشا دیو داس گانگرڈے (23)، اتم ایکناتھ جادھو (42)، الکا اتم جادھو (38)، دتاتریہ واگھ مارے (45)، انوسیا دتاتریہ واگھ مارے (40) اور بھاویش دیوی داس گانگرڈے (2) کے طور پر ہوئی ہے۔
قابل ذکر ہے کہ اس سے پہلے 19 جون کو پونے ضلع کے جیجوری-مور گاؤں روڈ پر بھی ایسا ہی حادثہ ہوا تھا جس میں 8 لوگوں کی موقع پر ہی موت ہو گئی تھی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔