گروتیغ بہادر کی برسی’شہیدی دیوس‘ پر تعطیل کااعلان، دہلی سمیت کئی ریاستوں میں کل بند رہیں گے اسکول اوردفتر

سکھ مذہبی رہنما گروتیغ بہادر کی برسی’شہیدی دیوس‘ کے موقع پر دہلی حکومت نے عام تعطل کااعلان کیا ہے۔اس اعلان کے مطابق 25 نومبر 2025 کو راجدھانی میں اسکول سے لے کر سرکاری دفاتر میں تعطیل رہے گی۔اسی طرح متعدد ریاستوں میں بھی ’شہیدی دیوس‘ کے موقع پر اسکولوںمیں چھٹی کا اعلان کئے جانے کی اطلاعات ہیں۔

تازہ اطلاعات کے مطابق دہلی حکومت نے گروتیغ بہادر کے ’شہیدی دیوس‘ کے موقع پر اسکولوں سمیت کالج اور دفاتر میں تعطیل کا اعلان کیا ہے۔ گروتیغ بہادر کے ’شہیدی دیوس‘ کے حوالے سے تعطیل کی تاریخ کو لے کرلوگ پہلے تذبذب کا شکار تھےکیونکہ یہ واضح نہیں کیاگیا تھاکہ تعطیل پیر (24 نومبر)کو ہے یا منگل(25 نومبر) کو اسکول بند رہیں گے۔

آج یہاں جاری سرکاری نوٹیفکیشن میں کہا گیا ہے کہ لیفٹیننٹ گورنر ونے کمار سکسینہ نے حکم جاری کرکے کہا ہے کہ دہلی حکومت کے تحت آنے والے سبھی دفاتر میں 25 نومبر کوعوامی تعطیل رہے گی۔ دہلی حکومت کے اعلان کے بعد کئی اسکولوں نے طلبا کو اس کی جانکاری نہیں دی ہے۔اس صورت میں صلاح دی جاتی ہے کہ وہ اپنے اپنے اسکولوں سے تصدیق کا انتظار کریں۔ بتادیں کہ دہلی۔این سی آر کے اسکولوں میں پہلے سے ہی کلاس 5 تک کے طلبا کی ہائبرڈ کلاس چل رہی ہیں۔

دریں اثنا معلوم ہوا ہے کہ اترپردیش حکومت نے سبھی سرکاری دفاتر کے لیے ’شہیدی دیوس‘ کی تعطیل کو باضابطہ طور پر 24 نومبر کی بجائے 25 نومبر 2025 کے لئے ٹرانسفرکردیا ہے۔روایت کے طورپر زیادہ تر ریاستوںمیں 24 نومبر کو چھٹی رہتی ہے لیکن 2025 کے کلینڈرمیں تاریخوں میں بدلاؤ دیکھا گیاہے۔