ہندوستان کو ’اسلام مُکت‘ بنانے کی تیاری!

’ہندو سماج پارٹی‘ کے قومی صدر کملیش تیواری نے ہندوؤں کے ہر گھر میں تلواررکھنے کی بات کی تھی اور اب پارٹی کے جھارکھنڈ صدر نے ہندوستان کو ’اسلام مُکت‘ کرنے کی بات کہہ کرفضا میں زہرگھولنے کی کوشش کی ہے۔

تصویر سوشل میڈیا
تصویر سوشل میڈیا
user

قومی آوازبیورو

ہندو شدت پسند تنظیم ’ہندو سماج پارٹی‘ کے جھارکھنڈ صدر گورو کمار جھا کا ایک ویڈیو سوشل میڈیا پر پوسٹ ہوا ہے جس میں انھوں نے ہندوستان کو ’اسلام مُکت‘ بنانے کے عزم کا ظہار کیا ہے۔ ساتھ ہی انھوں نے یہ بھی کہا ہے کہ اس مقصد کو حاصل کرنے کے لیے وہ اے کے-47 اور انساس کی فیکٹری بھی کھولنے کے لیے تیار ہیں۔ دراصل جب سے مودی حکومت مرکز میں برسراقتدار ہوئی ہے، ملک میں مذہبی منافرت پھیلانے کی ہندو شدت پسند تنظیموں کی کوششیں تیز ہو گئی ہیں۔ چونکہ عام انتخابات قریب آ چکے ہیں اور ہندو طاقتوں کو احساس ہونے لگا ہے کہ مسلمانوں کو لعن طعن کیے بغیر ہندوؤں کو متحد نہیں کیا جا سکتا، وہ کھل کر فضا میں زہر گھولنے کا کام کر رہے ہیں۔

’روی نایر‘ نامی ٹوئٹر ہینڈل سے پوسٹ کیے گئے اس متنازعہ ویڈیو میں ایک پرائیویٹ چینل کا نامہ نگار ’ہندو سماج پارٹی‘ کے جھارکھنڈ صدر گورو کمار جھا سے کچھ سوال کرتا ہے جس کے جواب میں وہ کہتے ہیں کہ ’’ہندو سماج پارٹی کا مقصد ’اسلام مُکت بھارت‘ ہے۔ لیکن میں جھارکھنڈ کا صدر ہوں تو میں صرف ایک ہی چیز کہنا چاہتا ہوں کہ جھارکھنڈ میں ہم مسلمان مُکت بھارت اور اسلام مُکت بھارت بنانے کی راہ پر کام کریں گے۔‘‘ ویڈیو میں وہ ہندو سماج پارٹی کے قومی صدر کملیش تیواری کا بھی تذکرہ کرتے ہیں اور کہتے ہیں کہ ’’کملیش تیواری جی نے آپ کو بتایا کہ ہم ہر ہندو کے گھر میں تلوار چاہتے ہیں۔ یہ فطری بات ہے کیونکہ اگر ہم آج ہر گھر میں تلوار نہیں رکھیں گے تو یہ مسلمان ہمارے گھروں میں گھس سکتے ہیں اور ہماری بہو بیٹیوں کو چھیڑ سکتے ہیں۔‘‘ وہ مزید کہتے ہیں کہ ’’ہمارا ماننا ہے کہ تلوار تو اب دور کی بات رہی، اگر گورو جھا کو ہندو حمایت کرنا شروع کر دیں تو یقین کیجیے کہ میں 47، انساس اور ایل ایم جی جیسے اسلحوں کی فیکٹری چلانا شروع کر دوں۔‘‘

روی نایر نے اس ویڈیو کے ساتھ ٹیکسٹ بھی کیا ہے جس میں انھوں نے لکھا ہے کہ آر ایس ایس نے ہندوستان کو ہزاروں ایسے بے وقوف دیے ہیں جن کا ذہنی توازن بگڑا ہوا ہے۔ اس ٹوئٹ کا جواب دیتے ہوئے ’ہندو سماج پارٹی‘ کے جھارکھنڈ صدر گورو کمار جھا نے اپنے ٹوئٹر ہینڈل پر لکھا ہے کہ ’’آر ایس ایس کو میرے ساتھ مت جوڑو۔ آر ایس ایس سے میرا کوئی لینا دینا نہیں۔‘‘ اس کے ساتھ ہی انھوں نے دھمکی آمیز لہجہ میں یہ بھی لکھ دیا کہ ’’عیسائیوں کے جہاد پر بھی کھل کے آ رہا ہوں، انتظار کرو۔‘‘

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 29 May 2018, 3:08 PM