ہریانہ حکومت کو ہائی کورٹ کی پھٹکار

نئی دہلی: ڈیرا سچا سودا کے سربراہ گرمیت رام رحیم کو پنچکولہ کی سی بی آئی کی خصوصی عدالت کے ذریعہ مجرم قرار دیئے جانے کے فوراً بعد ان کے حامیوں کی طرف سے کی گئی آگ زنی اور تشدد پر ہائی کورٹ نے سخت رخ اختیار کرتے ہوئے ہریانہ حکومت کو آڑے ہاتھوں لیا ہے۔ ہائی کورٹ نے کھٹر حکومت کو مسلسل تیسرے روز پھٹکار لگاتے ہوئے کہا کہ حکومت نے سیاسی فائدہ کے لئے شہر کو جلنے دیا۔ ہائی کورٹ نے حکومت پر یہ بھی تبصرہ کیا کہ ’’ایسا محسوس ہوتا ہے کہ حکومت نے سرینڈر کر دیا ہے‘‘۔

قبل ازیں جمعہ کو عدالتی فیصلے کے بعد پنجاب اور ہریانہ ہائی کورٹ نے حکم دیا تھا کہ گرمیت رام رحیم کے پیروکاروں کی طرف سے کیے جا رہے تشدد اور آگ زنی کی وجہ سے ہوئے نقصان کی تلافی ڈیرا سچا سودا سے کرائی جائے۔

ذرائع کے مطابق اسی حکم پر عمل آوری کرتے ہوئے آج فوج سرسا میں رام رحیم کے آشرم پہنچ گئی ہے ۔ بتایا جا رہا ہے کہ ڈیرا حامیوں کو وہاں سےباہر نکال کر آشرم کو خالی کرانے کی کارروائی شروع کر دی گئی ہے اور پولس بھی حالات کو قابو کرنے کے لئے فوج کی مدد کر رہی ہے۔ دوسری طرف ہریانہ کے وزیر اعلی منوہر لال کھٹر کے استعفیٰ کا مطالبہ زور وشور سے کیا جا رہا ہے۔ دریں اثنا وزیر داخلہ راجناتھ سنگھ نے آج صبح 11 بجے ڈیرا حامیوں کی غنڈ ہ گردی کے حوالے سے ایک اجلاس کی صدارت کی۔