دہلی میں تِین سے چَار خود کش حملہ ور داخل، ہائی ایلرٹ جاری

قومی راجدھانی دہلی میں ہائی ایلرٹ جاری کر دیا گیا ہے اور خبروں کے مطابق دہلی پولس کی اسپیشل سیل خود کش حملہ آوروں کی تلاش میں کئی جگہوں پر چھاپے مار رہی ہے۔ خبر ہے کہ دہلی میں تیوہار کے موقع پر دہشت گرد کسی بڑے حملہ کو انجام دینے کی سازش کر رہے ہیں۔ ایک ویب سائٹ میں شائع خبر کے مطابق خفیہ ایجنسیوں سے ملی معلومات کے مطابق جیش کے تین سے چار خود کش حملہ آور اس وقت دہلی میں داخل ہو چکے ہیں۔ بتایا جا رہا ہے کہ ان سبھی کے پاس جدید ہتھیار ہیں۔ اس اطلاع کے بعد کئی علاقوں میں سرچ آپریشن جاری ہے۔

دہشت گردانہ حملہ ہونے کی خبر کے بعد دہلی پولس نے ایلرٹ جاری کر دیا ہے جس کی وجہ سے عوامی مقامات پر سیکورٹی میں مزید اضافہ کر دیا گیا ہے۔ ریلوے اسٹیش، بس اسٹینڈ اور میٹرو اسٹیشنوں پر اضافی سیکورٹی لگا دی گئی ہے۔ میٹرو اسٹیشونوں پر تفتیش سخت کر دی گئی ہے۔ واضح رہے اس سے قبل کل یعنی بدھ کے روز دہلی کی پڑوسی ریاست پنجاب سے ایک دہشت گرد کو گرفتار کیا گیا ہے۔ خبروں کے مطابق یہ دہشت گرد بڑے حملہ کو انجام دینے کی تیاری کر رہا تھا۔ اس سے قبل ایس آئی ٹی نے امرتسر سے تین دہشت گردوں کو گرفتار کر کے ان کے پاس سے اے کے 47 کی دو رائفلیں اور گولا بارود برآمد کیا گیا تھا۔

واضح رہے پاکستان کی جانب سے لگاتار دراندازی کی کوشیشیں کی جا رہی ہیں اور جب اس کو اس میں کوئی کامیابی نہیں ملی تو اس نے ڈرون کے ذریعہ پنجاب میں ہتھیار بھیجنے کی کوشش کی۔ حال ہی میں پنجاب سے چار دہشت گردوں کو گرفتار کرنے کے ساتھ ہی ان کے پاس سے ایس آئی ٹی کو 4 ڈرون بھی ملے تھے جن میں سے تین کو پوری طرح ختم کر دیا گیا تھا، یہ سبھی ڈرون چین کے بنے ہوئے بتائے جاتے ہیں۔