ممبئی اور تھانے میں موسلا دھار بارش سے سیلابی صورتحال، الرٹ جاری، عام زندگی مفلوج

ممبئی: عروس البلاد ممبئی میں آج ایک بار پھرطوفانی بارش نے شہر ہی نہیں بلکہ نواح میں واقع تھانے، بھیونڈی، ممبرا، میرا روڈ اور اردگرد کے علاقوں میں سیلابی صورتحال پیدا کردی ہے اور صبح سویرے سے جاری بارش نے تین لوکل ریل لائنز اور سڑک پر موٹر گاڑیوں کی نقل و حمل کو بری طرح سے متاثر کیا ہے۔

دفتر موسمیات کے حکام نے کہا کہ طوفانی بارش اور تیز ہواؤں کا سلسلہ رات دیر گئے سے جاری ہے اور ممبئی سے متصل تھانے شہر اور ضلع میں 140 ملی میٹر بارش ہوئی ہے۔ بتایا جاتا ہے کہ تھانے کے ساتھ ساتھ ملنڈ، بھانڈوپ، نہور اور تھانے کے رابوڑی اور دیگر نشیبی علاقوں میں پانی رہائشی علاقوں میں گھس گیا اور کئی مکانات اور ہاوسنگ سوسائٹیوں سے مکینوں کو منتقل کیا گیا ہے جبکہ تھانے اسٹیشن مکمل طور پر ڈوب چکا ہے۔

موصولہ اطلاع کے مطابق ممبئی اور تھانے کے ساتھ ہی مغربی مہاراشٹر میں بھی اتوار تک ریڈ الرٹ جاری کردیا گیا ہے۔ ممبئی -گوا قومی شاہراہ پر زمین کھسکنے سے آمد و رفت متاثر ہوئی ہے اور سڑک کو دونوں سمت سے بند کردیا گیا ہے۔

محکمہ موسمیات کے ایک افسر نے کہا کہ کوکن اور وسطی مہاراشٹر میں حد سے زیاد ہ بارش ہونے کا امکان ہے۔ 4 اور 5 اگست کو تیز ہواؤں کے ساتھ موسلادھار بارش ہوگی۔ ممبئی میں جمعہ کی شب سے ہونے والی موسلادھار بارش نے قلب شہر نائیگام، دادر اور کنگ سرکل کے ساتھ ساتھ مضافات میں اندھیری، دہیسر، ملن اور ملاڈ سب وے کو موٹر گاڑیوں کے لیے بند کردیا گیا ہے جو کہ ویسٹرن ریلوے کی پٹریوں کے نیچے واقع ہے۔

میونسپل کارپوریشن کے مطابق بحرعرب میں مدوجزر کی وجہ سے پٹریوں کے پانی میں ڈوب جانے کے نتیجے میں سینٹرل اور ہاربر لائنوں کی لوکل ٹرینیں روک دی گئی ہیں جبکہ ویسٹرن ریلوے کی لوکل ٹرینیں تاخیر سے چلائی جا رہی ہیں۔ سمندر میں طغیانی کی وجہ سے باندرہ بینڈ اسٹینڈ میں نشیبی علاقوں کی بستیوں میں پانی گھس گیا ہے جبکہ ممبراعلاقہ میں ایک بہرکیف کی چھت منہدم ہونے سے ایک شخص زخمی ہوا اور تھانے میں بجلی کا جھٹکا لگنے سے ایک کی موت واقع ہوگئی۔

نوی ممبئی سے موصولہ خبر کے مطابق ایک پکنک اسپاٹ پر جھرنے میں ڈوب کر چار لڑکیوں کی موت واقع ہوگئی۔ پالگجر میں مویشی ندی میں بہہ گئے۔ بی ایم سی کے ذرائع نے اپیل کی ہے کہ شہری جمع پانی اور ساحل سے دور رہیں۔ حکام نے دوپہر ڈیڑھ بجے سے 24 گھنٹے کے لیے باجرہ وطوفانی بارش کی پیش گوئی کی ہے۔