دہلی سمیت 15 ریاستوں میں تیز بارش کا الرٹ، ممبئی میں اسکول-کالج بند

دہلی-این سی آر، ممبئی، آسام سمیت ملک کی کئی ریاستوں میں محکمہ موسمیات کی جانب سے زبردست بارش کا الرٹ جاری کیا گیا ہے۔ محکمہ موسمیات نے کہا ہے کہ مغربی مدھیہ پردیش، وِدربھ، چھتیس گڑھ، اتراکھنڈ اور اڈیشہ کے کچھ علاقوں میں موسلادھار بارش کا امکان بنا ہوا ہے۔ محکمہ موسمیات کا یہ بھی کہنا ہے کہ مشرقی دہلی، اتر پردیش کے مودی نگر، غازی آباد، چپرولہ، فرید آباد، پلول، سوہانا، بجنور، رڑکی، جہانگیر آباد، گلوٹھی، بلند شہر، علی گڑھ، امروہہ اور آس پاس کے علاقوں میں زوردار بارش کا امکان ہے۔

دوسری طرف زبردست بارش سے ممبئی کا برا حال ہے۔ ممبئی و اس کے قرب و جوار میں جمعہ کی رات سے زبردست بارش جاری ہے۔ ممبئی کے کرلا، باندرا-کرلا احاطہ، ساکی ناکہ، اندھیری، پوئی، ودیا وِہار، گھاٹ کوپر، کنجورمرگ، بھانڈپ، ملنڈ، ویلے پارلے، جوگیشوری، ملاڈ حلقہ میں تیز بارش سے معمولات زندگی درہم برہم ہے۔ سڑکوں پر چاروں طرف پانی ہی پانی دکھائی دے رہا ہے۔ محکمہ موسمیات نے مہاراشٹر، کونکن اور گوا میں ریڈ الرٹ جاری کیا ہے۔

ممبئی میں رات سے ہو رہی بارش کے سبب ممبئی ائیر پورٹ سے 10 فلائٹس کو رَد کر دیا گیا ہے۔ اس کے علاوہ ممبئی کے اندھیری علاقے میں آبی جماؤ کے سبب اندھیری سَب وے کو بند کر دیا گیا ہے۔ ٹرانس-ہاربر اور کھارکوپر کی جانب چلنے والے کوریڈور میں سنٹرل ریلوے کی ٹرینیں دھیمی چل رہی ہیں۔ اس سے مسافروں کو خاصہ پریشانی کا سامنا کرنا پڑ رہا ہے۔

مہاراشٹر کے پالگھر ضلع کے ضلع مجسٹریٹ نے سبھی اسکول اور کالجوں کو آج بند کرنے کا حکم جاری کیا ہے۔ وہیں ٹھانے میں آج سبھی سرکاری اسکول بند رہیں گے۔ ٹھانے میونسپل کارپوریشن نے شہر میں لگاتار بارش کو دیکھتے ہوئے یہ حکم جاری کیا ہے۔