شعلہ پور میں دلخراش سڑک حادثہ،درشن کرنے جارہے 5 لوگوں کی موت، نوشادی شدہ جوڑے کی حالت نازک

مہاراشٹر کے شعلہ پور میں خوفناک سڑک حادثہ پیش آیا ہے۔ یہاں کےتلجا پور میں دیو درشن کے لیے جا رہی کار حادثے کا شکار ہو گئی جس میں 5 لوگوں کی موقع پر ہی موت ہو گئی۔ اطلاعات کے مطابق کار سے نوشادی شدہ جوڑے کے ساتھ اس کے کئی رشتہ داربھی تلجا پور میں دیو درشن کے لیے نکلے تھے۔ اس حادثے میں میاں بیوی شدید زخمی ہوئے ہیں جن کی حالت نازک بتائی جارہی ہے۔

یہ افسوسناک واقعہ بارشی تحصیل کے گاؤں پانگری میں کار اور ٹرک کی آمنے سامنے ٹکر میں پیش آیا۔ پانگری گاؤں کے نزدیک جامبھل بیٹ پل پر پیش آئے حادثے میں کار مکمل طور پر تباہ ہوگئی۔ متوفیوں کی شناخت گوتم کامبلے، جیا کامبلے، سنجے واگھمارے اور ساریکا واگھمارے کے طور پرہوئی ہے۔اس موقع پر ایک دیگر خاتون کی بھی موت ہو گئی۔ انیکیت گوتم کامبلے اور میگھنا انیکیت کامبلے، جوصرف 4 دن قبل ہی شادی کے بندھن میں بندھے تھے، شدید طور سے زخمی ہیں۔

واقعے کی اطلاع ملتے ہی پولیس جائے وقوعہ پر پہنچی اور زخمیوں کو علاج کے لیے بارشی کے ایک پرائیویٹ اسپتال میں داخل کرایا۔ ابتدائی معلومات کے مطابق انیکیت اور میگھنا کی شادی 26 نومبر کو ہوئی تھی۔ دونوں کو لے کراہل خانہ تلجاپور میں واقع دیو درشن کے لیے جا رہے تھے جب یہ المناک حادثہ پیش آیا۔