ہریانہ کی تمام 20 جیلوں میں بورڈ آف وزیٹرس تشکیل، قیدیوں کے حقوق کی نگرانی ہوگی

ہریانہ حکومت نے سپریم کورٹ کے تاریخی فیصلے پر عمل درآمد کرتے ہوئے ریاست کی تمام 20 جیلوں کے لیے ضلعی سطح پر ’بورڈ آف وزیٹرس‘ تشکیل دیے ہیں۔ اس اقدام کا مقصد جیلوں میں قیدیوں کے انسانی حقوق کا تحفظ، ذات پات کی بنیاد پر امتیازی سلوک کا خاتمہ اور انتظامی شفافیت کو یقینی بنانا ہے۔ ان بورڈز میں ہریانہ انسانی حقوق کمیشن (ایچ ایچ آر سی) کی بھی نمائندگی ہوگی۔

کمیشن کے چیئرپرسن کی جانب سے نامزد نمائندے کے طور پر ڈاکٹر پونیت اروڑہ، اسسٹنٹ رجسٹرار، ہریانہ انسانی حقوق کمیشن کو بورڈ کا باضابطہ رکن مقرر کیا گیا ہے۔ کمیشن کے رجسٹرار دفتر نے 5 نومبر کو اس سلسلے میں محکمہ جیل کو سرکاری اطلاع بھیج دی تھی۔

ہریانہ حکومت کے محکمہ جیل کی جانب سے 30 اکتوبر 2026 کو جاری گزٹ نوٹیفکیشن کے مطابق ہر ضلع میں قائم بورڈ کی صدارت متعلقہ پرنسپل ڈسٹرکٹ جج کریں گے۔ اس میں ضلع مجسٹریٹ، سپرنٹنڈنٹ آف پولیس، چیف میڈیکل آفیسر، ضلع سماجی بہبود اور روزگار افسران سمیت مختلف محکموں کے نمائندے شامل ہوں گے۔ اس کے علاوہ اسمبلی اسپیکر کے نامزد کردہ تین ارکان اسمبلی، جن میں ایک خاتون ہوگی، اور دو سماجی کارکن بھی بورڈ کا حصہ ہوں گے۔ سماجی کارکنوں میں ایک خاتون کی شمولیت لازمی ہے۔

جیلوں میں ذات پات کی بنیاد پر امتیازی سلوک کا معاملہ صحافی سکنیا شانتا کی 10 دسمبر 2020 کو شائع ہونے والی ایک رپورٹ کے بعد قومی سطح پر زیر بحث آیا تھا۔ رپورٹ میں مختلف ریاستوں کے جیل دستورالعمل میں موجود ایسے ضوابط کی نشاندہی کی گئی تھی، جن کے تحت قیدیوں کو ان کی ذات کی بنیاد پر کام سونپے جاتے تھے اور بعض مقامات پر انہیں الگ بیرکوں میں رکھا جاتا تھا۔

3 اکتوبر 2024 کو اس وقت کے چیف جسٹس ڈی وائی چندرچوڑ کی سربراہی والی سپریم کورٹ کی تین رکنی بنچ نے تاریخی فیصلہ سناتے ہوئے ذات پات کی بنیاد پر امتیاز کو آئین کی بنیادی روح کے منافی قرار دیا تھا۔ عدالت نے ریاستوں کو جیل دستورالعمل میں ضروری ترامیم کرنے، جیل رجسٹروں سے ذات سے متعلق اندراجات ختم کرنے اور ہر قسم کے امتیازی سلوک کو روکنے کی ہدایت دی تھی۔ عدالت نے صنف اور معذوری کی بنیاد پر امتیاز کا بھی نوٹس لیا تھا۔

بعد ازاں 30 جولائی 2026 کو سپریم کورٹ نے تمام ریاستوں اور مرکز کے زیر انتظام علاقوں کو چار ہفتوں کے اندر ہر ضلع میں پرنسپل ڈسٹرکٹ جج کی سربراہی میں بورڈ آف وزیٹرس تشکیل دینے کا حکم دیا۔ 10 ستمبر کو عدالت نے دوبارہ تعمیلی رپورٹ طلب کی تھی۔

ہریانہ حکومت کے نوٹیفکیشن کے مطابق ہر بورڈ کو متعلقہ جیل کا کم از کم ہر تین ماہ میں ایک مرتبہ معائنہ کرنا ہوگا۔ معائنے کے لیے صدر سمیت کم از کم چار ارکان کی موجودگی ضروری ہوگی۔ اس دوران طبی سہولتوں، صفائی، کھانے، قانونی امداد، خواتین قیدیوں کی ضروریات، ذہنی صحت اور بازآبادکاری کے انتظامات کا جائزہ لیا جائے گا۔

ڈاکٹر پونیت اروڑہ نے کہا کہ انسانی حقوق کا تحفظ صرف قوانین اور ضابطوں تک محدود نہیں، بلکہ قیدیوں کے حقیقی مسائل اور بنیادی ضروریات کو سمجھنا بھی ضروری ہے۔ انہوں نے کہا کہ ہریانہ انسانی حقوق کمیشن کے چیئرپرسن جسٹس للت بترا اور ارکان کلدیپ جین اور دیپ بھاٹیہ ہر ماہ کسی ایک جیل کا معائنہ کرتے ہیں۔ قیدیوں سے براہ راست بات چیت کرکے ان کے مسائل متعلقہ حکام تک پہنچانا جیلوں کے نظام میں بہتری لانے کا اہم ذریعہ ہے۔