کرناٹک کے 423 عازمین حج حیدرآباد سے مدینہ کے لئے روانہ

حج ہاؤس سے عازمین کی روانگی کا منظر انتہائی جذباتی اور روح پرور تھا۔ سفید احرام میں ملبوس عازمین تلبیہ پڑھنے میں مصروف تھے، ان کے احباب اور رشتہ داروں نے ان کو بادیدہ نم وداع کیا۔

تصویر سوشل میڈیا
تصویر سوشل میڈیا
user

یو این آئی

حیدرآباد: تلنگانہ سے عازمین حج کی روانگی کا عمل آج سے شروع ہوگیا۔ اس طرح حیدرآباد کے نامپلی میں واقع حج ہاؤس میں حج 2019 کیمپ کا آج آغاز ہوا۔ کرناٹک کے 423 عازمین حج کا پہلا قافلہ آج جمعرات کی صبح 7.20 بجے شمس آباد انٹرنیشنل ایرپورٹ سے مدینہ منورہ کے لئے ایئر انڈیا کی فلائیٹ سے روانہ ہوگیا۔

حج ہاؤس سے عازمین کی روانگی کا منظر انتہائی جذباتی اور روح پرور تھا۔ سفید احرام میں ملبوس عازمین تلبیہ پڑھنے میں مصروف تھے، ان کے رشتہ داروں اور احباب نے ان کو بادیدہ نم وداع کیا اور ان سے دعاؤں کی گزارشں کرتے رہے۔ بدھ کی رات دیر گئے پہلے قافلہ کو خصوصی بسوں کے ذریعہ حج ہاؤس نامپلی سے ایئرپورٹ منتقل کیا گیا۔ صدر نشین حج کمیٹی مسیح اللہ خاں، چیف اگزیکیٹیو آفیسر حج کمیٹی بی شفیع اللہ اور دوسروں نے عازمین کا استقبال کیا اور حج ہاؤس سے پہلے قافلہ کو جھنڈی دکھاکر وداع کیا۔

دوسرے قافلوں کی روانگی کا 26 جولائی سے آغاز ہوگا اور یہ سلسلہ 4 اگست تک جاری رہے گا۔ اس موقع پر ایئرپورٹ پر میڈیا سے بات کرتے ہوئے مسیح اللہ خان صدر نشین تلنگانہ حج کمیٹی نے کہا کہ پہلی فلائٹ مدینہ منورہ کے لئے روانہ ہوئی۔ انہوں نے کہا کہ عازمین حج کی روانگی کے مناسب انتظامات کیے گئے تھے۔ انہوں نے کہا کہ تلنگانہ کے عازمین حج کی فلائٹس کی روانگی 26 جولائی سے ہوگی اور آخری فلائٹ 4 اگست کو ہوگی۔