گروگرام: کوڑے کے پہاڑ میں لگی شدید آگ، لوگوں کی آنکھوں میں جلن اور سانس لینے میں دقت کی شکایت

گروگرام: فرید آباد روڈ پر بندھ واڑی میں کوڑے کے پہاڑ پر ہفتہ کی رات 8 بجے سے لگی آگ ابھی تک جل رہی ہے۔ اس طرح تقریباً 20 گھنٹوں سے اس آگ پر اب تک قابو نہیں پایا جا سکا ہے، جس سے لوگوں کی آنکھوں میں جلن اور سانس لینے میں دقتیں پیش آ رہی ہیں۔

اس آگ کو بجھانے کے لیے فائر بریگیڈ کی 20 سے زیادہ گاڑیاں لگی ہوئی ہیں۔ گروگرام کے ساتھ ساتھ فرید آباد اور پلول سے بھی فائر بریگیڈ کی گاڑیاں آئی ہیں۔ پھر بھی آگ پر قابو نہیں پایا جا سکا ہے۔ ہر بار گرمیاں شروع ہوتے ہی بندھ واڑی میں کوڑے کے پہاڑ میں آگ لگنے کا معاملہ پیش آ رہا ہے۔ ہفتہ کی رات آٹھ بجے اچانک کوڑے سے دھواں نکلتا دیکھ ملازمین نے اس کی اطلاع سیکٹر 29 فائر اسٹیشن کو دی۔

فی الحال آگ لگنے کی وجوہات کا پتہ نہیں چل سکا ہے لیکن اسے بڑی مصیبت بننے سے روکنے کے لیے فائر بریگیڈ کی ٹیم مسلسل کوشش کر رہی ہے۔ اب تک درجنوں فائر بریگیڈ کی گاڑیاں آگ بجھانے میں لگی ہیں۔ فائر بریگیڈ محکمہ کے مطابق 80 سے 90 فیصد آگ پر قابو پایا جا چکا ہے۔ آگ کی وجہ سے گروگرام-فرید آباد روڈ پر دھواں پھیلنے سے ٹریفک بھی متاثر ہوئی ہے جس سے گاڑی ڈرائیوروں کو پریشانی کا سامنا کرنا پڑ رہا ہے۔

واضح رہے کہ بندھ واڑی لینڈ فل سائٹ پر کچھ دنوں پہلے بھی شدید آگ لگ گئی تھی۔ یہ آگ وہاں پر لگی تھی جہاں کوڑا ڈسپوزل کرنے کا کام چل رہا تھا۔ اس واقعہ کے بعد بندھ واڑی لینڈ فِل سائٹ پر موجود ملازمین میں ہنگامہ مچ گیا تھا۔ سبھی ملازمین کوڑے کے پہاڑ سے دور چلے گئے۔ ۔ اطلاع ملنے کے بعد فائر بریگیڈ کی پانچ گاڑیوں نے آگ پر کافی مشقت کے بعد قابو پایا تھا۔