الیکٹرانکس مینوفیکچرنگ کے فروغ کے لیے مرکزی حکومت کا بڑا فیصلہ، اہم پرزوں اور مشینری پر کسٹم ڈیوٹی میں رعایت

نئی دہلی: مرکزی حکومت نے ملک میں الیکٹرانکس مینوفیکچرنگ کو فروغ دینے اور گھریلو پیداوار کو مزید مضبوط بنانے کے مقصد سے کئی اہم الیکٹرانک پرزوں اور سرمایہ جاتی مشینری کی درآمد پر کسٹم ڈیوٹی میں رعایت دینے کا فیصلہ کیا ہے۔ حکومت کا کہنا ہے کہ اس اقدام سے اسمارٹ فون، لیتھیم آئن بیٹری، برقی گاڑیوں اور دیگر جدید الیکٹرانک مصنوعات کی تیاری کی لاگت میں کمی آئے گی، مقامی صنعت کی مسابقتی صلاحیت بڑھے گی اور ہندوستان کو جدید الیکٹرانکس اور بیٹری مینوفیکچرنگ کے عالمی مرکز کے طور پر فروغ دینے میں مدد ملے گی۔

اس سلسلے میں مرکزی بالواسطہ ٹیکس اور کسٹم بورڈ نے تین الگ الگ نوٹیفکیشن جاری کیے ہیں۔ ان نوٹیفکیشنز کے تحت کسٹم ڈیوٹی میں چھوٹ اور رعایتی شرح سے فائدہ اٹھانے والی اشیا کی فہرست میں توسیع کی گئی ہے تاکہ الیکٹرانکس صنعت کو ضروری خام مال اور مشینری کم لاگت پر دستیاب ہو سکے۔

حکومت نے ایک نوٹیفکیشن کے تحت گاڑیوں، طبی آلات اور صنعتی استعمال کے لیے ڈسپلے اسمبلی تیار کرنے میں استعمال ہونے والے پانچ اہم پرزوں کو اکتیس مارچ دو ہزار انتیس تک بنیادی کسٹم ڈیوٹی سے مستثنیٰ قرار دیا ہے۔ ان میں ڈسپلے سیل، فلیکسبل پرنٹڈ سرکٹ اسمبلی، بیک لائٹ یونٹ، فریم اور اینائسوٹروپک کنڈکٹیو فلم شامل ہیں۔

البتہ حکومت نے واضح کیا ہے کہ یہ رعایت موبائل فون، اسمارٹ واچ، اسمارٹ میٹر، ٹیلی ویژن پینل اور انٹرایکٹو فلیٹ پینل ڈسپلے میں استعمال ہونے والی ڈسپلے اسمبلی پر لاگو نہیں ہوگی۔

ایک دوسرے نوٹیفکیشن کے تحت حکومت نے سیلولر موبائل فون میں وائرلیس چارجنگ کے لیے استعمال ہونے والے انڈکٹر کوائل ماڈیول کی تیاری میں کام آنے والے چھ اہم پرزوں پر بھی اکتیس مارچ دو ہزار انتیس تک صفر کسٹم ڈیوٹی برقرار رکھنے کا فیصلہ کیا ہے۔ ان پرزوں میں نینو کرسٹلائن اسمبلی، ای شیلڈ، پی ای ٹی لائنر، پی سی شِم، اسٹرینڈڈ اور این ایف سی کوائل کے علاوہ نیوڈیمیم، آئرن اور بوران سے تیار مقناطیس شامل ہیں۔

تیسرے نوٹیفکیشن کے تحت لیتھیم آئن سیل کی تیاری میں استعمال ہونے والی مشینری کی سابقہ فہرست کی جگہ پچاسی اقسام کی سرمایہ جاتی مشینری کی نئی اور تفصیلی فہرست جاری کی گئی ہے۔ اس میں کوٹنگ مشین، وائنڈنگ مشین، ویلڈنگ نظام، جانچ کے آلات، فارمیشن مشین، ڈرائنگ نظام اور دیگر خصوصی مشینیں شامل ہیں، جن پر رعایتی کسٹم ڈیوٹی کا فائدہ حاصل ہوگا۔

حکومت کے مطابق ان رعایتوں سے پیداواری لاگت میں کمی آئے گی، مقامی صنعت کی مسابقت میں اضافہ ہوگا، الیکٹرانکس اور برقی گاڑیوں کے شعبے میں گھریلو قدر افزائی کو فروغ ملے گا اور درآمدی مشینری و پرزوں کی لاگت کم ہونے سے ملک میں جدید مینوفیکچرنگ کو مزید رفتار حاصل ہوگی۔ حکومت نے واضح کیا ہے کہ یہ تمام رعایتیں اکتیس مارچ دو ہزار انتیس تک مؤثر رہیں گی اور ان کا مقصد ہندوستان کو جدید الیکٹرانکس اور بیٹری مینوفیکچرنگ کے شعبے میں عالمی سطح پر زیادہ مضبوط مقام دلانا ہے۔