جنرل راوت کے آخری دیدار کو گئے راکیش ٹکیت کے خلاف نعرے بازی، اکھلیش نے کہا ’بی جے پی والوں کو ملک معاف نہیں کرے گا‘

10 دسمبر کو نم آنکھوں کے ساتھ ہندوستان کے پہلے چیف آف ڈیفنس اسٹاف جنرل بپن راوت کو آخری وداعی دے دی گئی۔ جنرل راوت اور ان کی بیوی مدھولیکا کا جسد خاکی جمعہ کی شام سپردِ آتش کر دیا گیا۔ اس سے قبل سرکاری رہائش پر دونوں کا جسد خاکی لوگوں کے آخری دیدار کے لیے رکھا گیا تھا۔ اس دوران اس وقت ایک عجیب و غریب ماحول پیدا ہو گیا جب کسان لیڈر راکیش ٹکیت جنرل بپن راوت کو خراج عقیدت پیش کرنے کے لیے پہنچے۔ کچھ لوگوں نے راکیش ٹکیت کو دیکھ کر اچانک ’راکیش ٹکیت مردہ باد‘ کا نعرہ بلند کرنا شروع کر دیا۔

راکیش ٹکیت کے خلاف نعرے بازی کرنے والوں پر سماجوادی پارٹی سربراہ اکھلیش یادو نے سخت حملہ کیا ہے۔ انھوں نے الزام عائد کیا ہے کہ نعرہ بازی کرنے والے لوگوں کا تعلق بی جے پی سے ہے۔ اس تعلق سے اکھلیش یادو نے ایک ٹوئٹ بھی کیا ہے جس میں لکھا ہے کہ ’’جنرل راوت جی کے آخری سفر میں کسان لیڈر راکیش ٹکیت جی کے خلاف نعرے لگانے والے بی جے پی والوں نے ثابت کر دیا ہے کہ وہ ’جے جوان، جے کسان‘ کے نعرہ میں یقین نہیں کرتے۔ یہ فوج کی بھی بے عزتی ہے، اور کسان کی بھی۔ غم کے اس وقت میں بی جے پی والوں کا ایسا برا سلوک ملک معاف نہیں کرے گا۔‘‘

واضح رہے کہ 10 دسمبر کو چیف آف ڈیفنس اسٹاف کی سرکاری رہائش کے باہر ٹکیت جیسے ہی نظر آئے، کچھ لوگوں نے ’راکیش ٹکیت مردہ باد‘ کا نعرہ لگانا شروع کر دیا۔ خبر رساں ایجنسی اے این آئی سے بات چیت میں نعرہ لگانے والے ایک شخص نے کہا کہ ’’راکیش ٹکیت ملک کا دشمن ہے۔ ملک کو بہت پیچھے لے گیا ہے، اس لیے نعرے لگائے جا رہے ہیں۔‘‘ ایک دیگر شخص کا کہنا تھا کہ ’’ایسے (برے) آدمی کو عظیم ہستی کا آخری دیدار کرنے کے لیے نہیں آنا چاہیے تھا۔ یہ غلط ہے۔‘‘