غازی آباد میں افسوسناک حادثہ: بے قابو کار نے صبح کی سیر پر نکلے 4 افراد کو کچلا، 3 خواتین ہلاک

نئی دہلی: قومی راجدھانی سے ملحق اتر پردیش کے غازی آباد میں ایک افسوسناک واقعہ پیش آیا۔ ہفتے کو صبح کی سیر پر نکلنے والی تین خواتین کو ایک کار نے کچل دیا۔ حادثے میں تینوں کی موت ہو گئی۔ پولیس نے متوفیوں کی لاشوں کو پوسٹ مارٹم کے لیے بھیج دیا۔ حادثے میں ایک شخص شدید زخمی بھی ہوا جس کو علاج کے لیے اسپتال میں بھرتی کرایا گیا ہے۔  پولیس ڈرائیور کی تلاش کر رہی ہے جو حادثے کے بعد سے فرار ہے۔

رپورٹ کے مطابق، یہ واقعہ غازی آباد کے راکیش مارگ، جی ٹی روڈ پر پیش آیا۔ عینی شاہدین نے بتایا کہ ایک تیز رفتار کار نے وپن شرما، مینو پرجاپتی، کملیش اور ساوتری دیوی کو کچل دیا۔  اس حادثے میں تین خواتین کو شدید چوٹیں آئیں۔ حادثے کے فوری بعد زخمیوں کو اسپتال منتقل کر دیا گیا۔ ڈاکٹروں نے تصدیق کی کہ مینو اور ساوتری کو جب اسپتال لایا گیا تو دونوں کی موت ہو چکی تھی، جبکہ کملیش علاج کے دوران دم توڑ گئی۔

واقعہ کی معلومات دیتے ہوئے غازی آباد کے ڈی سی پی شہر دھول جیسوال نے بتایا کہ حادثہ کے بعد ڈرائیور موقع سے فرار ہو گیا۔ پولیس نے کار کو قبضے میں لے لیا ہے۔ تمام مرنے والوں کی لاشوں کو پوسٹ مارٹم کے لیے بھیج دیا گیا ہے۔ پولیس کار ڈرائیور کی تلاش کر رہی ہے جو حادثے کے بعد سے فرار ہے۔