ایودھیا میں دلت بہنوں کی اجتماعی عصمت دری، ملزمان پولیس کی گرفت سے باہر

یوگی حکومت کے دوران یوپی میں دلتوں پر ظلم و ستم کی کئی خبریں منظر عام پر آئی ہیں، تازہ معاملہ ایودھیا ضلع کا ہے، یہاں دو دلت بہنوں کو مبینہ طور پر یرغمال بنا کر اجتماعی آبروریزی کا نشانہ بنایا گیا

سوشل میڈیا 
سوشل میڈیا
user

قومی آوازبیورو

ایودھیا: یوگی حکومت کے دوران یوپی میں دلتوں پر ظلم و ستم کی کئی خبریں منظر عام پر آئی ہیں، تازہ معاملہ ایودھیا ضلع کا ہے، یہاں دو دلت بہنوں کو تین افراد نے مبینہ طور پر یرغمال بنا کر اجتماعی آبروریزی کا نشانہ بنایا۔ پولیس کا کہنا ہے کہ متاثرہ بہنوں کو طبی معائنہ کے لئے بھیجا گیا ہے، جن میں سے ایک متاثرہ نابالغ ہے۔

رپورٹ کے مطابق واقعہ اس وقت پیش آیا جب دونوں بہنیں بیکاپور تھانہ میں واقع اپنے گاؤں کے پاس شیرپورہ بازار سے لوٹ رہی تھیں۔ تینوں ملزمان نے انہیں مبینہ طور پر یرغمال بنا لیا اور گنے کے کھیت میں لے جا کر عصمت دری کی۔ اتنا ہی نہیں ملزمان سنگین نتائج بھگتنے کی دھمکی دیتے ہوئے فرار ہو گئے۔ تاحال کسی ملزم کے گرفتار ہونے کی اطلاع نہیں ہے۔ بیکاپور علاقہ کے سرکل آفیسر پرمود کمار یادو کا کہنا ہے کہ ملزمان کو پکڑنے کے لئے بڑے پیمانے پر تلاشی مہم شروع کر دی گئی ہے۔


رپورٹ کے مطابق دونوں لڑکیوں نے واپسی کے ایک دن بعد اپنے گھر والوں کو واقعے کے بارے میں بتایا، جس کے بعد پولیس کو تحریری درخواست دی گئی۔ ابتدائی طور پر کچھ مقامی پولیس اہلکاروں نے معاملے کو دبانے کی کوشش کی لیکن بعد میں متاثرہ کے والد کے مطابق اعلیٰ پولیس افسران کی مداخلت کے بعد ایف آئی آر درج کی گئی۔

پولیس نے بھائی لال یادو، تربھون یادو اور ایک نامعلوم شخص کے خلاف تعزیرات ہند کی دفعہ 376-ڈی (گینگ ریپ)، 323 (دانستہ طور پر چوٹ پہنچانا)، 504 (بدسلوکی) اور 506 (مجرمانہ دھمکی) کے تحت ایف آئی آر درج کی گئی ہے۔ سرکل آفیسر نے بتایا کہ ملزمان کے خلاف دلتوں پر مظالم اور بچوں کے تئیں جنسی جرائم کی روک تھام قانون کے تحت بھی الزامات عائد کئے گئے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔