بہار میں گنگا میں طغیانی، کئی علاقوں پر سیلاب کا خطرہ

گنگا سمیت کئی اہم ندیوں کی آبی سطح میں اضافہ کے بعد پٹنہ کے کئی علاقوں میں سیلاب کا پانی داخل ہو گیا ہے۔ پٹنہ میں گنگا ندی اپنے ساحلوں کو چھوڑ کر گاؤں کی جانب گامزن ہے۔

تصویر یو این آئی
تصویر یو این آئی

قومی آوازبیورو

پٹنہ، بہار میں ایک مرتبہ پھر سیلاب کی صورت حال پیدا ہو گئی ہے۔ یہاں گنگا سمیت کئی اہم ندیوں کی آبی سطح میں اضافہ کے بعد پٹنہ کے کئی علاقوں میں سیلاب کا پانی داخل ہو گیا ہے۔ پٹنہ میں گنگا ندی اپنے ساحلوں کو چھوڑ کر گاؤں کی جانب گامزن ہے۔

اطلاعات کے مطابق جمعہ کے روز بھی گنگا، گنڈک اور باگمتی کئی علاقوں میں خطرے کے نشان سے اوپر بہہ رہی ہے۔ وزیر اعلیٰ نتیش کمار نے جمعرات کی شام سیلاب متاثرہ علاقوں کا دورہ کرکے وہاں کی صورت حال کاجائزہ لیا۔ وزیر اعلیٰ جمعہ کو بھی سیلاب متاثرہ علاقوں کا فضائی دورہ کر رہے ہیں۔

بہارمیں گنگا ندی کی آبی سطح میں اضافہ کے سبب پٹنہ اور اس سے ملحقہ علاقوں میں بھی پانی داخل ہو گیا ہے۔ گنگا کی طغیانی کی وجہ سے بکسر، بھاگلپور اور منگیر میں بھی سیلاب کا پانی گاؤں میں داخل ہونے لگا ہے۔

پٹنہ کے بختیار پور میں دیارہ علاقہ پانی میں ڈوب گیا ہے۔ ان علاقوں میں سینکڑوں ایکڑ اراضی میں کھڑی فصل پانی میں ڈوب کر برباد ہو گئی ہے۔ بلاک کی کالا دیارا، روپس مروآہی، چریا، ہرداس پور اور ست بھیا رام نگر پنچایتوں کے گاؤں کے ذیلی علاقوں میں گنگا کا پانی داخل ہو جانے سے لوگ پالتو جانوروں کے ساتھ بالائی مقامات پر پناہ لینے کو مجبور ہیں۔

ادھر، محکمہ آبی وسائل کے ایک افسر نے جمعہ کو بتایا، ’’ریاست میں بیشتر ندیوں میں طغیانی آئی ہوئی ہے۔ گنگا ندی بہار میں بکسر، پٹنہ، دیگھا گھاٹ، گادھی گھاٹ، ہاتھی دہ اور بھاگلپور ضلع کے کہل گاؤں میں خطرے کے نشان سے اوپر بہہ رہی ہے۔ باگمتی ندی ڈھینگ اور بینی بد میں خطرے کے نشان کو پار کر چکی ہے جبکہ بوڑھی گنڈک کھگڑیا میں اور کملا بلان ندی مدھوبنی میں خطرے کے نشان سے اوپر بہہ رہی ہے۔

وزیر اعلیٰ نتیش کمار نے جمعرات کو پٹنہ میں گنگا ندی کی آبی سطح کا جائزہ لیا۔ دیگھا گھاٹ سے این آئی ٹی گھاٹ تک کا معائنہ کرنے پہنچے وزیر اعلیٰ نے کہا، ’’گنگا اپھان پر ہے لیکن سال 2016 میں آئے سیلاب جیسی صورت حال فی الحال نہیں ہے۔ کوئی نہیں جانتا کہ کل کیا ہوگا، محتاط رہنے کی ضرورت ہے۔ ‘‘

انہوں نے دعوی کیا کہ حکومت کی طرف سے کسی بھی طرح کی صورت حال سے نمٹنے کی پوری تیاری ہے۔ انہوں نے کہا کہ ولہ خود جمعہ کو بکسر اور پٹنہ کے درمیان فضائی معائنہ بھی کریں گے۔ انہوں نے محکمہ آبی وسائل، آفات انتظامی محکمہ کے علاوہ تمام متعلقہ اضلاع کے ضلع مجسٹریٹوں کو محتاط رہنے کو کہا ہے۔

Published: 20 Sep 2019, 3:10 PM