سہارنپور میں ہولناک واقعہ: ایک کمرے سے ماں، باپ اور دو بچوں سمیت 5 لاشیں برآمد، پولیس تحقیقات جاری

اتر پردیش کے ضلع سہارنپور میں ایک دل دہلا دینے والے واقعے نے پورے علاقے میں سنسنی پیدا کر دی ہے، جہاں ایک ہی خاندان کے 5 افراد ایک کمرے میں مردہ پائے گئے ہیں اور سبھی کے گولیاں لگی ہوئی ہیں۔ مرنے والوں میں اشوک، ان کی اہلیہ انچیتا، والدہ ودیاوتی اور دو بیٹے کارتک اور دیو شامل ہیں۔ واقعہ سامنے آتے ہی پولیس و فورنسک ٹیم فوری طور پر موقع پر پہنچ گئی۔

پولیس کے مطابق اشوک اور انچیتا کی لاشیں کمرے کے فرش پر ملی ہیں، جبکہ ودیاوتی اور دونوں بچوں کی لاشیں بستر پر پائی گئیں۔ تمام افراد کے جسموں پر گولیوں کے زخم موجود ہیں۔ ابتدائی جانچ میں یہ بات سامنے آئی ہے کہ بچوں کے ماتھے پر گولی کے نشانات ہیں، جبکہ اشوک کے سینے پر گولی لگی ہوئی تھی۔ کمرے سے تین طمنچے بھی برآمد کیے گئے ہیں، جس سے معاملہ مزید پیچیدہ ہو گیا ہے۔

ابتدائی تفتیش میں پولیس کو شبہ ہے کہ اشوک نے پہلے اپنی والدہ، اہلیہ اور دونوں بیٹوں کو گولی مارنے کے بعد خود کو بھی گولی مار لی، تاہم اس مفروضے کی حتمی تصدیق ابھی نہیں ہو سکی ہے۔ پولیس اس زاویے سے بھی جانچ کر رہی ہے کہ کہیں خاندان پر کسی قسم کا قرض، نوکری سے متعلق دباؤ، گھریلو تنازعہ یا ذہنی دباؤ تو نہیں تھا، جس کی وجہ سے ایسا انتہائی قدم اٹھایا گیا ہو۔

پولیس اس امکان کو بھی نظرانداز نہیں کر رہی کہ کسی بات پر شدید جھگڑا ہوا ہو اور غصے میں فائرنگ کی گئی ہو۔ ساتھ ہی اس پہلو کی بھی جانچ جاری ہے کہ کہیں کسی بیرونی شخص نے گھر میں داخل ہو کر واردات تو انجام نہیں دی۔ اہل خانہ کے کسی سے تنازعہ، لین دین یا دشمنی کے پہلوؤں پر بھی تفصیلی جانچ کی جا رہی ہے۔ قریبی علاقوں میں لگے سی سی ٹی وی کیمروں کی فوٹیج کھنگالی جا رہی ہے اور پڑوسیوں سے پوچھ گچھ کی جا رہی ہے۔

پولیس کے مطابق اشوک نکوڑ تحصیل میں امین کے عہدے پر تعینات تھے اور انہیں اپنے والد کی وفات کے بعد متوفی کے کوٹے میں یہ ملازمت ملی تھی۔ پڑوسیوں کا کہنا ہے کہ خاندان پرسکون مزاج تھا اور کسی سے کسی قسم کا تنازعہ سامنے نہیں آیا تھا۔ پولیس نے گھر کو سیل کر کے تمام موبائل فون قبضے میں لے لیے ہیں اور پوسٹ مارٹم و فورنسک رپورٹ کا انتظار کیا جا رہا ہے، جس کے بعد ہی واقعے کی اصل وجہ واضح ہو سکے گی۔