ممبئی سے اللہ کے مہمانوں کا پہلا قافلہ مدینہ منورہ روانہ، جی ایس ٹی ختم کرنے کا مطالبہ

ممبئی: آج یہاں چھتر پتی شیواجی مہاراج بین الاقوامی ہوائی اڈہ سے اللہ کے مہمانوں کا پہلا قافلہ مدینہ منورہ کے لئے روانہ ہوگیا ،ان عازمین حج کی اکثریت مدھیہ پردیش سے تعلق رکھتی تھی، اس موقع پر موجود عمائدین، حج کمیٹی کے ممبران اور دیگر رہنماؤں نے مرکزی حکومت سے ایک مرتبہ پھرمطالبہ کیا ہے کہ حجاج کرام کو پانچ فیصد جی ایس ٹی سے مستثنیٰ قرار دیا جائے، کیونکہ سبسڈی کے ختم کیے جانے کے بعد گزشتہ سال 18فیصد جی ایس ٹی نافذ کی گئی تھی، لیکن امسال اسے کم کرکے 5 فیصد کردی گئی ہے۔اس موقع پر منعقدہ تقریب میں مرکزی وزیر مختار عباس نقوی کی غیر حاضری میں سابق ریاستی وزیر برائے اقلیتی امور اور مہاراشٹر کے ڈپٹی اپوزیشن لیڈر عارف نسیم خان، حج کمیٹی کے ممبر اور مہاراشٹر کے کورڈینیٹرحاجی ابراھیم شیخ، مہاراشٹر حج کمیٹی چیئرمین جمال صدیقی، وقف کونسل کے وسیم خان، مہاراشٹر بورڈ کے ممبر خالد بابوقریشی، سی ای او مقصود خان اور دیگر نے خطاب کیا۔

مہاراشٹر اسمبلی میں ڈپٹی اپوزیشن لیڈر اور سابق وزیر برائے اقلیتی امور عارف نسیم خان نے کہا کہ مہاراشٹر حج کمیٹی کے سابق چیئرمین اور موجودہ کورڈی نیٹر ابراھیم شیخ غلام نبی گزشتہ چند سال سے اللہ کے مہمانوں کے لیے الوداعی تقریب کا انعقاد ایئرپورٹ پر کرتے ہیں، ہم ایک عرصہ سے مطالبہ کرتے رہے ہیں کہ ہندوستان میں مسلمانوں کی آبادی کے تناسب سے حج کے کوٹہ میں اضافہ کیا جائے، جوکہ امسال سے تسلیم کرلیا گیا ہے اور اس بار ہم حکومت ہند سے مطالبہ کرتے ہیں کہ عازمین حج پر عائد کیے جانے والے پانچ فیصد جی ایس ٹی کو ختم کر دے تاکہ سبسڈی ختم کیے جانے کے بعد مہنگے ہوئے حج میں کچھ حد تک راحت ملے۔

اس سے قبل سعودی عرب کے قونصل جنرل سعد ظفر ایس الغرنی نے اعلان کیا کہ حکومت سعودی عرب نے عازمین حج کے لیے جدہ، مکہ مکرمہ، مدینہ منورہ اور عرفات اور منیٰ میں سہولیات کے لیے مکمل انتظامات کیے ہیں۔ انہوں نے قرآن میں دیئے گئے اللہ کے فرمان کا ذکر کیا جس میں رب العزت کی جانب سے حج بیت اللہ کا حکم دیا گیا ہے اور اس کے تحت دنیا جہاں سے اللہ کے مہمان مکہ پہنچ رہیں ہیں۔

انہوں نے آج روانہ ہونے والے عازمین حج اور تمام ہندوستانی حجاج کو مبارکباد پیش کرتے ہوئے مطلع کیا کہ امسال سے سعودی عرب نے ہندوستانی حاجیوں کے کوٹہ میں 25 ہزار کا اضافہ کر دیا ہے جبکہ سعودی انتظامیہ نے حج اور عمرہ کے لیے ویزے کی سہولت آن لائن کردی تاکہ ضرورت مند آسانی سے اسے حاصل کرسکتے ہیں۔ اب حج کمیٹی کے افسران اور نجی ٹورآپریٹروں کو سعودی سفارت خانہ یا قونصل خانے آئے بغیر آن لائن ویزا مہیا کرایا جاسکے گا۔ اسی طرح جدہ اور مدینہ منورہ ایئرپورٹ پر مختلف جانچ سہولیات کو آسان کر دیا گیا جبکہ جدہ اور مکہ مکرمہ کے درمیان ایک نیا ہوائی اڈہ تعمیر کیا جا رہا ہے، تاکہ عازمین حج آسانی سے منزل مقصود تک پہنچ سکیں۔

اس موقع پرحج کمیٹی کے مہاراشٹر میں کورڈی نیٹراور مرکزی حج کمیٹی کے ممبر حاجی ابراھیم غلام نبی نے بھی جی ایس ٹی سے حج کے سفر کو مستثنیٰ کرنے کا مطالبہ کرتے ہوئے اس کا مطالبہ کئی سال سے جاری ہے اور پہلے 18فیصد جی ایس ٹی نافذ کیا گیا تھا، لیکن امسال حکومت نے پانچ فیصد کر دیا ہے، جسے ہٹا دیا جانا چاہیے کیونکہ حج سبسڈی کو ختم کیے جانے کے بعد حج مہنگا ہوگیا ہے اور جی ایس ٹی ہٹانے سے ایک حد راحت ملے گی۔

ابراھیم شیخ نے کہا کہ کئی سال سے ہندوستانی حاجیوں کا کوٹہ بڑھانے کے لیے میمورنڈم دیا جاتا رہا ہے اور یہ پُرمسرت موقعہ ہے کہ سعودی عرب سے مرکزی وزیرمختارعباس نقوی کے بہتر انداز میں رابطہ کے سبب کوٹہ میں اضافہ ہوا ہے اور اب ہم نے جی ایس ٹی سے حاجیوں کو مستثنیٰ کیاجانا چاہیے۔ انہوں نے امید ظاہر کی ہے کہ مستقبل میں اس مسئلہ کو بھی بخوبی حل کرلیا جائے گا۔

مہاراشٹر حج کمیٹی کے چیئرمین جمال صدیقی نے اپنے خطاب میں حاجیوں کو مبارکباد پیش کرتے ہوئے کہا کہ مرکزی حکومت حج کمیٹی کے ذریعہ عازمین حج کو بہتر سے بہتر سہولیات فراہم کرانے کی منصوبہ بندی کرتی رہی ہے اور یہ سلسلہ جاری رہیگا۔ ہماری کوشش ہوگی کہ عازمین حج کے مسائل کو جانے اور انہیں حل کرانے کے لیے حکومت ہند اور سعودی حکام سے رجوع کریں۔ اس تقریب سے ممبئی کے میئر مڈیشور، سابق ریاستی وزیر کرپا شنکر سنگھ، وقف بورڈ کے اہم رکن خالد قریشی، وسیم خان، حج کمیٹی کے چیف ایکزیکٹیو آفیسرمقصوداحمد خان نے بھی بھی خطاب کیا۔

حج کمیٹی امبرکشن پوائنٹ کے انچارج حشمت پرکار نے مطلع کیا کہ آج پہلی فلائٹ سے سعودی عرب ایئرلائنس کی ہے اور 450 عازمین حج کو مدینہ منورہ لے کر روانہ ہوئی ہے۔ اس موقع پر پی 9 کے احاطہ میں عازمین حج کے استقبال کے لیے شامیانہ لگایا گیا تھا اور انہیں ایک جانماز، گلدستہ اور حج کے متعلق کتاب پیش کی گئی۔