گاؤں کو ڈھال بنا کر مورٹار اور میزائل داغ رہا ہے پاکستان، جواب میں 5 چوکیاں تباہ

جموں و کشمیر کے پلوامہ میں سی آر پی ایف کے قافلہ پر ہوئے دہشت گردانہ حملہ کا ہندوستان نے بدلہ لے لیا ہے اور پاکستان میں گھس کر جیش محمد کے ٹھکانوں پر حملہ کیا ہے۔ منگل کی صبح 12 میراج۔2000 لڑاکو جہازوں نے پاکستان کے بالاکوٹ میں دہشت گردوں کے بڑے ٹھکانوں پر حملہ کیا اور ان ٹھکانوں کو پوری طرح تباہ کر دیا۔ اس سے بوکھلائے پاکستان نے منگل کی شام کو لائن آف کنٹرول (ایل او سی) پر زبردست فائرنگ شروع کر دی۔ پاکستان ایل او سی پر 12 سے 15 مقامات پر ہیوی کاربائن ہتھیاروں سے فائرنگ کر رہا ہے۔

ہندوستان نے جوابی کارروائی میں پاکستان کی پانچ چوکیاں تباہ کر دی ہیں جس میں پاکستان کے کئی جوان مارے گئے ہیں۔ پاکستانی فوجی گاؤں والوں کو انسانی ڈھال کے طور پر استعمال کر رہا ہے اور عام شہریوں کے گھروں پر مورٹار اور میزائل داغ رہا ہے۔ نیوز 18 کی خبر کے مطابق اس گولاباری میں ہندوستان کے دس جوان زخمی ہوئے ہیں جبکہ کوئی بھی جوان شدید زخمی نہیں ہے۔۔

پاکستان کے بالاکوٹ میں منگل کی صبح ہندوستانی فضائیہ نے جیش کے ٹھکانوں پر بمباری کی تھی اور اس بمباری کے بعد سے پاکستان پوری طرح بوکھلا یا ہوا ہے۔ کل شام سے پاکستان نے ایل او سی کے کئی مقامات پر بمباری کی۔ ویسے ایل او سی پر بمباری کوئی نئی بات نہیں ہے اور گزشتہ تین دنوں سے اس میں تیزی آئی ہے لیکن کل یہ کافی زیادہ بڑھ گئی تھی۔ ہندوستانی افواج نے اس بمباری کا پاکستان کو منہ توڑ جواب دیا