ہندوستان میں آسمان سے برسنے والی ہے آگ! اپریل-جون میں معمول سے زیادہ پڑے گی گرمی، محکمہ موسمیات کا الرٹ جاری

ہندوستان میں اپریل سے جون تک درجہ حرارت معمول سے زیادہ رہنے کا امکان ہے۔ ساتھ ہی ہندوستان کے مشرق وسطیٰ اور شمال مغربی میدانی علاقوں میں معمول سے کچھ زیادہ دن لو چل سکتی ہے۔ یہ جانکاری ہندوستانی محکمہ موسمیاتی سائنس (آئی ایم ڈی) نے پیر کے روز دی۔

آئی ایم ڈی چیف مرتیونجے مہاپاترا نے پریس کانفرنس میں کہا کہ مغربی اور شمالی ہندوستان کے کچھ علاقوں کو چھوڑ کر ملک کے بیشتر حصوں میں زیادہ سے زیادہ درجہ حرارت معمول سے زیادہ رہے گا۔ مہاپاترا نے مزید کہا کہ اپریل سے جون تک شمالی اور مشرقی ہندوستان کے بیشتر حصوں، وسطی ہندوستان اور شمال مغربی ہندوستان کے میدانی علاقوں میں معمول سے 2 سے 4 دن زیادہ لو چلنے کا امکان ہے۔

عام طور پر ہندوستان میں اپریل سے جون تک 4 سے 7 دن تک لو چلتی ہے۔ آئی ایم ڈی کے ایک افسر نے پہلے کہا تھا کہ شمال مغربی ہندوستان میں گرمیوں کے دوران لو کے دنوں کی تعداد دوگنی ہو سکتی ہے۔ اس علاقے میں گرمیوں کے موسم کے دوران عام طور پر 5 سے 6 دن لو چلتی ہے۔ جن ریاستوں میں معمول سے زیادہ دن لو چلنے کا امکان ہے، ان میں راجستھان، گجرات، ہریانہ، پنجاب، مدھیہ پردیش، مہاراشٹر، اتر پردیش، بہار، جھارکھنڈ، مغربی بنگال، اڈیشہ، چھتیس گڑھ، تلنگانہ، آندھرا پردیش، کرناٹک اور تمل ناڈو کے شمالی حصے شامل ہیں۔

اس درمیان ماہرین کا کہنا ہے کہ ہندوستان کو اس سال گرمیوں کے موسم میں بجلی کی طلب میں 9 سے 10 فیصد کے اضافہ کے لیے تیار رہنا چاہیے۔ گزشتہ سال ملک بھر میں بجلی کی زیادہ سے زیادہ طلب 30 مئی کو 250 گیگا واٹ کو پار کر گئی تھی، جو قبل میں کیے گئے اندازوں سے 6.3 فیصد زیادہ تھی۔ ماحولیاتی تبدیلی بجلی کی طلب میں اضافہ کرنے والے اہم عناصر میں سے ایک ہے۔