مندسور میں وزیر اعلیٰ موہن یادو کے ہاٹ ایئر بیلون میں لگی آگ، بال بال بچے

مدھیہ پردیش کے مندسور میں ہفتہ کو وزیر اعلیٰ ڈاکٹر موہن یادو ایک بڑے حادثے کا شکار ہونے سے بال بال بچ گئے۔ دراصل مندسور میں ہاٹ ایئر بیلون میں اُڑان بھرنے سے ٹھیک پہلے آگ لگ گئی۔ حالانکہ موقع پر موجودہ اہلکاروں نے فوراً آگ پر قابو پا لیا جس سے ایک بڑا حادثہ ہونے سے ٹل گیا۔

ذرائع کے  مطابق وزیر اعلیٰ ڈاکٹر موہن یادو گاندھی ساگر فاریسٹ اسٹریٹ پہنچے اور یہاں انہوں نے بوٹنگ کا لطف اٹھایا۔ اس کے بعد وہ صبح سویرے مندسور کے رکن پارلیمنٹ سدھیر گپتا کے ساتھ ہاٹ ایئر بیلون کے تفریحی سفر پر نکلنے والے تھے۔ لیکن ہوا کی رفتارمناسب نہیں ہونے سے بیلون اڑ نہیں سکا۔

بتایا جا رہا ہے کہ بیلون میں ہوا بھری جا رہی تھی، تبھی اس میں آگ لگ گئی۔ حادثے کے وقت وزیر اعلیٰ موہن یادو بیلون کے ٹھیک نیچے کھڑے تھے اور سیکوریٹی گارڈ نے ٹرالی کو سنبھال رکھا تھا۔ اہلکاروں کی مستعدی کی وجہ سے آگ کوفوراً بجھا دیا گیا اور وزیر اعلیٰ پوری طرح سے محفوظ ہیں۔ اس حادثہ کے بعد وزیر اعلیٰ کا ہاٹ ایئر بیلون کا سفر منسوخ کر دیا گیا۔

ہاٹ ایئر بیلون کے ماہر نے بتایا کہ صبح 6 سے 7.30 بجے کے درمیان ہوا کی رفتار نہ کے برابر رہتی ہے۔ ہاٹ ایئر بیلون میں ہوا کی رفتار زیرو ہونی چاہیے لیکن جب وزیر اعلیٰ سوار ہوئے تب رفتار 15 سے 20 کلومیٹر فی گھنٹہ تک تھی۔ اس وجہ سے بیلون اوپر نہیں جا سکا۔ جب اس میں ہوا بھری جا رہی تھی تو وہ نیچے جھک گیا۔ اس سے نچلے حصے میں آگ لگ گئی۔ اس کے ٹھیک نیچے وزیر اعلیٰ کھڑے تھے۔ اس کی وجہ سے سی ایم سیکوریٹی بھی الرٹ ہوئی اور ٹرالی کو سنبھالے رکھا۔ دوسری طرف ماہرین اور اہلکاروں نے آگ کو بجھایا۔

اس دوران وزیر اعلیٰ موہن یادو نے کہا کہ گاندھی ساگر مہا ساگر کے برابر ہے۔ یہاں قدرتی طور سے بھی وائلڈ لائف کی دولت ہے۔ میں رات میں یہیں رکا تھا اور واٹر ایکٹیویٹی میں شامل ہوا۔ سیاحوں کے یہ سورگ کی طرح ہے۔ انہوں نے کہا کہ بیرون ملک کیوں جانا جب یہیں پر ایسی وراثت اور اسپاٹ دستیاب ہیں۔