ٹی ایم سی رکن پارلیمنٹ ابھیشیک بنرجی کے خلاف ایف آئی آر درج، اشتعال انگیز تقریر کا ہے معاملہ

آل انڈیا ترنمول کانگریس (ٹی ایم سی) کے رکن پارلیمنٹ اور سابق وزیر اعلیٰ بنگال ممتا بنرجی کے بھتیجے ابھیشیک بنرجی کی مشکلات بڑھتی ہوئی نظر آ رہی ہیں۔ اسمبلی انتخابات کی مہم کے دوران مبینہ طور پر اشتعال انگیز تقریر کرنے کے معاملے میں ابھیشیک بنرجی کے خلاف بدھان نگر سائبر کرائم پولیس اسٹیشن میں ایک ایف آئی آر درج کی گئی ہے۔

یہ شکایت سماجی کارکن راجیب سرکار کی جانب سے 5 مئی کو درج کرائی گئی تھی، جو کہ انتخابی نتائج کا اعلان ہونے کے ٹھیک ایک دن بعد کا وقت ہے۔ باگوئی آٹی تھانے میں دی گئی اپنی شکایت میں راجیب سرکار نے الزام عائد کیا کہ ابھیشیک بنرجی نے انتخابی مہم کے دوران کئی عوامی جلسوں میں نہ صرف اشتعال انگیز بیانات دیے، بلکہ مرکزی وزیر داخلہ امت شاہ کو براہ راست دھمکی بھی دی تھی۔ شکایت کنندہ نے اپنے الزامات کو پختہ کرنے کے لیے ابھیشیک بنرجی کی ان متنازعہ تقریروں کے کئی ویڈیو لنکس بھی بطور ثبوت پولیس کو سونپے ہیں۔

ہندی نیوز پورٹل ’آج تک‘ پر شائع خبر کے مطابق شکایت کنندہ راجیب سرکار کی شکایت اور ابتدائی جانچ کی بنیاد پر پولیس نے اس معاملے کو سنجیدگی سے لیا ہے۔ پولیس نے ابھیشیک بنرجی کے خلاف مجموعی طور پر 5 سنگین دفعات کے تحت معاملہ درج کیا ہے۔ ان میں بھارتیہ نیائے سنہیتا (بی این ایس) کی 3 الگ الگ دفعات اور انتخابی ضابطہ اخلاق و قوانین کی خلاف ورزی کے سلسلے میں ’عوامی نمائندگی ایکٹ‘ کی 2 دفعات شامل ہیں۔

فی الحال سائبر کرائم پولیس اس معاملے کی گہرائی سے تحقیقات کر رہی ہے اور سونپے گئے ویڈیو فوٹیج کی سچائی کی جانچ کی جا رہی ہے۔ اس واقعہ کے بعد مغربی بنگال کی سیاست میں سیاسی ہلچل تیز ہونے کے امکانات ہیں۔ ترنمول کانگریس کی طرف سے اب تک اس معاملے پر کوئی آفیشیل ردعمل سامنے نہیں آیا ہے۔