وزارت خزانہ میں جانے کے لئے صحافیوں کو لینی ہوگی پیشگی اجازت 

حکومت نے کل دیر رات اس سلسلے میں ایک نوٹس جاری کیا ہے جس میں کہا گیا ہے کہ صحافیوں کو وزارت میں افسران سے ملاقات کے لئے پہلے اجازت لینی ہوگی اور اسی کی بنیاد پر وزارت میں داخلہ ملے گا۔

تصویر سوشل میڈیا
تصویر سوشل میڈیا
user

یو این آئی

نئی دہلی: نارتھ بلاک میں واقع وزارت خزانہ کے دفتر میں داخلہ کے لئے صحافیوں کو اب متعلقہ افسران سے پیشگی اجازت لینی ہوگی۔ حکومت نے کل دیر رات اس سلسلے میں ایک نوٹس جاری کیا جس میں کہا گیا ہے کہ صحافیوں کو وزارت میں افسران سے ملاقات کے لئے پہلے اجازت لینی ہوگی اور اسی کی بنیاد پر وزارت میں داخلہ ملے گا۔ حالانکہ وزارت میں داخلہ پر کسی طرح کی پابندی عائد کرنے سے انکار کیا گیا ہے۔

وزارت کی طرف سے جاری نوٹس میں یہ واضح کیا گیا ہے کہ نارتھ بلاک میں صحافیوں کے داخلہ پر کوئی پابندی نہیں ہے۔ لیکن صحافیوں کے داخلہ کو بہتر بنانے اور اس سے متعلقہ عمل کو درست کیا گیا ہے۔ اس میں کہا گیا ہے کہ وزیر خزانہ کے طور پر نرملا سیتا رمن کے چارج سنبھالنے کے بعد پہلی ملاقات میں صحافیوں نے کسی پریشانی کے بغیر رپورٹنگ کے لئے ایک علیحدہ ویٹنگ روم الاٹ کرنے کی اپیل کی تھی۔ الگ کمرہ نہیں ہونے کی وجہ سے افسران سے ملاقات کے لئے صحافیوں کو کوریڈور میں انتظار کرنا پڑتا ہے۔


وزارت نے کہا کہ وزیر خزانہ کی ہدایت پر نارتھ بلاک میں گیٹ نمبر دو کے باہر میڈیا کے لئے خاطرخواہ نظم کیا گیا ہے جس میں ایرکنڈیشنڈ کمرہ، پانی، چائے، کافی وغیرہ مقررہ وقفے سے دستیاب کرائے جائیں گے۔ اس میں بیٹھنے کے ساتھ ہی الیکٹرانک آلات کو چارج کرنے کا بھی نظم کیا گیا ہے۔

اس میں کہا گیا ہے کہ پی آئی بی کی طرف سے جاری ایکریڈیشن کارڈ کے ذریعہ لوگوں کو پیشگی اجازت کی بنیاد پر داخلہ ملے گا۔ اس کے علاوہ وزارت میں داخلہ پر کوئی دیگر پابندی نہیں ہے۔ عام بجٹ کی تیاریوں کے سلسلے میں نارتھ بلاک میں دس جون سے صحافیوں کا داخلہ روک دیا گیا تھا۔ بجٹ پیش کیے جانے کے بعد اس کو واپس لے لیا جاتا تھا لیکن اس مرتبہ ایسا نہیں ہوا ہے۔ حالانکہ صحافی اس کی مخالفت کر رہے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔