راکیش ٹکیت کی قیادت میں 4 دسمبر کو نوئیڈا میں ہوگی کسانوں کی مہاپنچایت، یوپی سمیت کئی ریاستوں کے کسانوں کی شرکت متوقع

اتر پردیش کے نوئیڈا میں ہزاروں کسان حکومت کے ذریعہ لی گئی زمینوں کے مناسب معاوضے کا مطالبہ کرتے ہوئے احتجاج کر رہے ہیں۔ احتجاج کے دوران سنیوکت کسان مورچہ میں شامل کسان لیڈران کی آج گرفتاری ہوئی جس کے بعد ایک بار پھر ہنگامہ بڑھنے کے آثار پیدا ہو گئے ہیں۔ اس معاملے میں بھارتیہ کسان یونین ٹکیت (بی کے یو) نے ایک مہاپنچایت منعقد کرنے کا فیصلہ کیا ہے۔ یہ مہاپنچایت بدھ (4 دسمبر) کو گریٹر نوئیدا کے زیرو پوائنٹ پر ہوگا۔ اس مہاپنچایت کی قیادت راکیش ٹکیت خود کریں گے۔ اس بات کا بھی قوی امکان ہے کہ اس مہاپنچایت میں مغربی اتر پردیش کے ساتھ ساتھ کئی دیگر ریاستوں کے کسان بھی شامل ہوں گے۔ دوسری جانب سیسولی پنچایت سے نریش ٹکیت نے لوگوں سے ٹریکٹرس کے ذریعہ نوئیڈا پہنچنے کی اپیل کی ہے۔

بدھ کو ہونے والی مہاپنچایت کا مقصد کسان لیڈران کی گرفتاری کے خلاف آواز اٹھانا اور کسانوں کو درپیش مسائل سے حکومت کو آگاہ کرنا ہے۔ راکیش ٹکیت نے اس موقع پر کسانوں کو اپنے اتحاد کا مظاہرہ کرنے اور حکومت پر دباؤ بنانے کی اپیل کی ہے۔ انہوں نے مہاپنچایت کا اعلان کرتے ہوئے کہا کہ کسان لیڈران کو گرفتار کر کے حکومت کسان تحریک کو کمزور کرنے کی کوشش کر رہی ہے۔ اس ایشو پر پنچایت میں بحث ہوگی، اور پھر آگے کی حکمت عملی تیار کی جائے گی۔

بھارتیہ کسان یونین ٹکیت کے ضلعی ترجمان سنیل پردھان نے کہا کہ اس مہاپنچایت میں خاص طور سے راکیش ٹکیت موجود رہیں گے۔ اس دوران وہ کسانوں کو اپنے اتحاد کو برقرار رکھنے اور جدوجہد کو مزید تیز کرنے کی تلقین کریں گے۔ دراصل کسان لیڈران اس بات سے ناراض ہیں کہ کسانوں کی گرفتاری کا عمل انجام دے کر حکومت کسان تحریک کو کمزور کرنا چاہتی ہے۔ حالانکہ کسان لیڈران کی گرفتاری کے باوجود کسانوں نے تحریک پوری مستعدی سے جاری رکھی ہوئی ہے، اور وہ اپنے قدم پیچھے کھینچنے کو تیار نہیں ہیں۔