ونیش پھوگاٹ کی جگجیت ڈلیوال سے ملاقات، مضبوط عزائم والا کسان لیڈر قرار دیا

نئی دہلی: پنجاب کے کھنوری بارڈر پر حالات کشیدہ ہیں جہاں کسان رہنما جگجیت سنگھ ڈلیوال 20 دن سے مسلسل بھوک ہڑتال پر ہیں۔ ان کی حالت تشویش ناک ہونے کے باوجود، وہ اپنی جدوجہد جاری رکھے ہوئے ہیں۔ کھنوری بارڈر پر ان سے ملاقات کے لیے مشہور پہلوان اور جولانہ سے ایم ایل اے ونیش پھوگاٹ اپنے شوہر سومبیر راٹھی کے ہمراہ پہنچیں۔

ونئش پھوگاٹ نے میڈیا سے بات کرتے ہوئے کہا کہ جگجیت سنگھ ڈلیوال نہایت مضبوط ارادوں والے کسان رہنما ہیں، جو اپنی صحت اور زندگی کی پروا کیے بغیر کسانوں کے مستقبل کے لیے لڑ رہے ہیں۔ انہوں نے کہا، ’’یہ بڑی بات ہے کہ ایک شخص جو کینسر کا مریض ہے اور اپنی بیوی کو کھو چکا ہے، وہ ہماری بھلائی کے لیے بھوک ہڑتال پر ہے۔ حکومت کو ان کی حالت پر توجہ دینی چاہیے۔‘‘

اس موقع پر پنجاب کے ڈی جی پی گورو یادو اور مرکزی وزارت داخلہ کے ڈائریکٹر مَینک مشرا نے بھی ڈلیوال سے ملاقات کی۔ ڈی جی پی گورو یادو نے میڈیا کو بتایا کہ سپریم کورٹ کے حکم کے مطابق حکومت نے فوری طور پر طبی سہولیات فراہم کرنے کا فیصلہ کیا ہے۔ انہوں نے کہا، ’’ہم نے وزیراعلیٰ بھگونت مان کا پیغام ڈلیوال تک پہنچایا ہے کہ ان کی زندگی بہت قیمتی ہے اور حکومت ان کے مسائل حل کرنے کے لیے تیار ہے۔‘‘

ڈی جی پی نے مزید کہا کہ احتجاجی مقام پر ایمبولینس اور دیگر طبی سہولیات فراہم کی گئی ہیں۔ پنجاب حکومت اور انتظامیہ کسانوں سے مسلسل رابطے میں ہیں اور ریاستی حکومت مرکز کے ساتھ مل کر مسائل کے حل کے لیے سنجیدہ کوششیں کر رہی ہے۔

مرکزی وزارت داخلہ کے ڈائریکٹر مَینک مشرا نے کہا کہ وہ سپریم کورٹ کے حکم پر ڈلیوال کی شکایات سننے اور ان کے مطالبات کا جائزہ لینے آئے ہیں۔ انہوں نے یقین دلایا کہ حکومت کسانوں کے مسائل کے حل کے لیے اقدامات کرے گی۔