دہلی میں شدید گرمی: درجہ حرارت 45 ڈگری سیلسیس تک پہنچنے کا امکان

قومی راجدھانی دہلی میں چلچلاتی گرمی سے فی الحال راحت ملنے کی کوئی امید نظر نہیں آ رہی اور اتوار کو پارہ 45 ڈگری سیلسیس کو چھونے کا امکان ہے

دہلی میں شدید گرمی
دہلی میں شدید گرمی
user

یو این آئی

نئی دہلی: قومی راجدھانی دہلی میں چلچلاتی گرمی سے فی الحال راحت ملنے کی کوئی امید نظر نہیں آ رہی اور اتوار کو پارہ 45 ڈگری سیلسیس کو چھونے کا امکان ہے۔

محکمہ موسمیات کا کہنا ہے کہ اتوار کو زیادہ سے زیادہ درجہ حرارت 45 ڈگری سیلسیس تک پہنچ سکتا ہے۔ تاہم محکمہ نے پیر کو 'دھول کے طوفان یا گرج چمک کے ساتھ طوفان' کی پیش گوئی کی ہے اور زیادہ سے زیادہ درجہ حرارت 41 ڈگری کے آس پاس رہے گا۔


شدید گرمی کی لہر کے حالات کے پیش نظر اتوار کو دارالحکومت میں 'یلو' الرٹ جاری کیا گیا ہے۔ اس موسم گرما میں دہلی میں گرم ہواؤں اور ہیٹ ویو کا یہ پانچواں دور ہے۔ اس سے پہلے ایک راؤنڈ مارچ میں اور تین اپریل میں آیا تھا۔

محکمہ موسمیات نے کہا کہ 14 اور 15 مئی کو پنجاب اور ہریانہ-دہلی میں مختلف علاقوں میں گرمی کی لہر کی وجہ سے شدید ہیٹ ویو کے حالات متوقع ہیں، آج بھی اتر پردیش کے مختلف حصوں میں ایسی ہی صورتحال رہے گی۔

اس سے قبل محکمہ نے دہلی میں گرمی کی لہر کے لیے 'اورنج الرٹ' جاری کیا تھا اور پارہ 46-47 ڈگری سیلسیس تک بڑھنے کی پیش گوئی کی تھی۔ ہفتہ کو منگیش پور میں زیادہ سے زیادہ درجہ حرارت 47.2 ڈگری سیلسیس ریکارڈ کیا گیا، جبکہ نجف گڑھ میں 47 ڈگری سیلسیس ریکارڈ کیا گیا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔