کیرانہ سمیت 4 لوک سبھا سیٹوں پر ضمنی انتخاب 28 مئی کو

اتر پردیش کی کیرانہ لوک سبھا سیٹ پر ضمنی انتخاب کا اعلان ہو گیا ہے۔ وہاں 28 مئی کو ووٹنگ ہوگی اور 31 مئی کو ووٹوں کی گنتی کی جائے گی۔ اس کے علاوہ انتخابی کمیشن نے جمعرات کو مہاراشٹر کی بھنڈارا گونڈا اور پال گھر لوک سبھا سیٹ کے ساتھ ساتھ ناگالینڈ کی ناگالینڈ لوک سبھا سیٹ پر بھی ضمنی انتخاب کرانے کا فیصلہ لیا ہے۔ ملک کی 10 اسمبلی سیٹوں کے لیے بھی ضمنی انتخابات کی تاریخوں کا اعلان انتخابی کمیشن نے کیا ہے۔ ان سبھی لوک سبھا اور اسمبلی سیٹوں پر ایک ہی دن یعنی 28 مئی کو ووٹنگ ہوگی اور اس کی گنتی 31 مئی کو کی جائے گی۔

اتر پردیش کی بات کی جائے تو انتخابی کمیشن یہاں کی کیرانہ لوک سبھا سیٹ اور بجنور ضلع کی نور پور اسمبلی سیٹ پر ضمنی انتخاب کرائے گی۔ کیرانہ سیٹ بی جے پی ممبر پارلیمنٹ حکم سنگھ کے انتقال سے خالی ہوئی تھی جب کہ نور پور اسمبلی سیٹ بی جے پی ممبر اسمبلی لوکیندر سنگھ کے انتقال کی وجہ سے خالی ہوئی تھی۔

اتر پردیش کے علاوہ انتخابی کمیشن نے مہاراشٹر کی بھنڈارا گونڈیا اور پلگھر کے ساتھ ساتھ ناگالینڈ کی ناگالینڈ لوک سبھا سیٹ اور بہار کی جوکی ہاٹ، جھارکھنڈ کی گومیا، سِلّی، کیرالہ کی چینگنور، مہاراشٹر کی پالوس کادیگاؤں، میگھالیہ کی امپاتی، پنجاب کی شاہ کوٹ، اتراکھنڈ کی تھرالی اور مغربی بنگال کی مہیش تالا اسمبلی سیٹ کے ضمنی انتخابات بھی انہی کے ساتھ کرانے کا اعلان کیا۔ ان سبھی سیٹوں پر نامزدگی کی آخری تاریخ 10 مئی ہے۔ 11 مئی تک نامزدگی کی جانچ اور 14 مئی نام واپس لینے کی تاریخ طے کی گئی ہے۔ ان ضمنی انتخابات میں سبھی جگہ ای وی ایم اور وی وی پیٹ کا استعمال کیا جائے گا۔